སྦྱིན་པ།

བྱམས་པ་དང་བྱམས་པར་འོས་པ་ནི་དགོས་ངེས་ཡིན་མོད། འོན་ཀྱང་འཇིག་རྟེན་གྱི་བདེ་སྡུག་ལ་མི་རྣམས་ཀྱིས་བྱམས་པ་དང་བྱམས་པར་འོས་པའི་དོན་དེ་མི་ཤེས།

མི་རྣམས་ཀྱིས་བྱམས་པ་ཞེས་འབོད་པ་ནི་ཅི་ཞིག་ཡིན་མི་ཤེས་ལ་དེ་ཉིད་རྨོངས་ཞེན་དང་འཇིགས་སྐྲག་ཏུ་ནོར་འགྲོ།

མི་རྣམས་ཀྱིས་བྱམས་པ་དང་བྱམས་པར་འོས་པ་ཤེས་ན། འཛམ་བུ་གླིང་འདིར་དམག་འཁྲུག་གི་རིགས་གཏན་ནས་འབྱུང་མི་སྲིད།

དངོས་འབྲེལ་བདེ་སྐྱིད་ལྡན་ཐུབ་པའི་གཉེན་སྒྲིག་མང་པོ་ཞིག་ནི་བསམ་ངན་རྙིང་པ་རྣམས་སེམས་ལ་གསོག་འཇོག་བྱས་པའི་དབང་གིས་བདེ་སྐྱིད་མི་འབྱུང་།

གལ་ཏེ་ཁྱོ་ཤུག་གཉིས་ལ་བློ་ཁོག་ཡོད་ན། སྡུག་བསྔལ་གྱི་འདས་དོན་རྣམས་བརྗེད་ནས་བདེ་སྐྱིད་ཀྱིས་ཁེངས་པའི་མི་ཚེ་སྐྱེལ་ཐུབ།

བློས་བྱམས་པ་བསད་དེ་མེད་པར་བཟོ། ཉམས་མྱོང་དང་། མི་དགའ་བའི་དོན་རྙིང་། ཕྲག་དོག་སོགས་དོན་རྣམས་སེམས་ལ་བསགས་པས་བྱམས་པ་བརླག་པར་བྱེད།

བཟའ་ཟླ་མི་དགའ་བའི་བུད་མེད་མང་པོ་ཞིག་ལ་བློ་ཁོག་ཡོད་ན་འདས་དོན་རྣམས་བརྗེད་དེ་ད་ལྟའི་ཁྱོ་ལ་དགའ་ཞེན་བྱེད་པའི་བདེ་སྐྱིད་ལྡན་ཐུབ།

སྐྱེས་པ་མང་པོ་ཞིག་ལ་བློ་ཁོག་ཡོད་ན། ཆུང་མ་རྣམས་ཀྱི་ནོར་འཁྲུལ་རྙིང་པ་བསྲིང་བར་བྱེད་པ་དང་བསམ་ངན་རྣམས་བརྗེད་དེ་དགའ་བདེའི་འཚོ་བ་སྐྱེལ་བར་བརྩོན་ན་ཆུང་མ་ལ་དགའ་ཞེན་བླ་མེད་སྐྱེ་ཐུབ།

གཉེན་སྒྲིག་བྱས་པའི་སྐྱེ་བོ་དག་གིས་དུས་ཚོད་ཀྱི་ནང་དོན་ཤིན་ཏུ་ཟབ་མོ་རྟོགས་དགོས།

ཁྱོ་ཤུག་གཉིས་ཀྱིས་འདས་དོན་བརྗེད་དེ་ད་ལྟ་དགའ་སྤྲོའི་ངང་འཚོ་བ་སྐྱེལ་བར་བརྩོན་ན་རྟག་པར་གཉེན་སྒྲིག་བྱས་མ་ཐག་པ་ལྟ་བུར་ཚོར་དགོས།

བྱམས་པ་དང་བསམ་ངན་གཉིས་ནི་མ་མཐུན་པའི་རྡུལ་ཕྲན་གྱི་གྲུབ་ཆ་རེད། བྱམས་པའི་ནང་བསམ་ངན་གང་ཡང་ཡོད་མི་རུང་། བྱམས་པ་ནི་རྟག་པར་བཟོད་སྲན་ཡིན།

གྲོགས་དང་དགྲ་ལ་སྡུག་བསྔལ་མྱོང་བར་སེམས་ཁྲལ་དངོས་གནས་བྱེད་མཁན་ལ་བྱམས་པ་ཡོད། དམན་པ་དང་དབུལ་ཕོངས། དགོས་མཁོ་ཡོད་མཁན་རྣམས་ཀྱི་བདེ་རྩར་ལྷག་བསམ་རྣམ་དག་གིས་ལས་ཀ་བྱེད་མཁན་ལ་བྱམས་པ་དངོས་གནས་ཡོད།

ཞིང་པས་རྔུལ་ཆུ་དང་བཅས་ཞིང་ས་ལ་ཆུ་འདྲེན་པར་དགའ་ཞེན་དང་། གྲོང་གསེབ་པའི་སྡུག་བསྔལ་དང་སྤྲང་པོས་ཊམ་ཀ་ཞིག་སློང་བ། ལམ་འགྲམ་དུ་ལྟོགས་ཤི་ཐེབས་པའི་ཁྱི་ཕྲུག་ལ་སྙིང་རྗེ་སྐྱེ་མཁན་ནི་བྱམས་པ་ཡིན།

ང་ཚོས་སེམས་གཏིང་ནས་མི་གཞན་ལ་རོགས་རམ་བྱེད་དུས། རང་བཞིན་དང་ངང་ངམ་ཤུགས་ཀྱིས་གང་གིས་ཀྱང་བཀའ་བཀོད་མེད་པར་ལྗོན་ཤིང་ལ་བདག་སྐྱོང་དང་མེ་ཏོག་ལ་ཆུ་བླུགས་པར་དངོས་འབྲེལ་གྱི་བློ་ཁོག་དང་སྙིང་རྗེ། དངོས་གནས་ཀྱི་བྱམས་པ་ཡོད།

འཛམ་བུ་གླིང་འདིའི་བདེ་སྡུག་ལ་མི་རྣམས་ལ་དངོས་གནས་ཀྱི་བློ་ཁོག་མེད། མི་རྣམས་ཀྱིས་རང་ཉིད་ཀྱི་དོན་དག་སྒྲུབ་པ་དང་རེ་འདོད་གྲུབ་པ། རྒྱལ་ཁ་ཐོབ་པ། ཤེས་ཡོན་དང་ཉམས་མྱོང་ཡོད་པ་སོགས་ལ་སེམས་ཁུར་བྱེད།

འཇིག་རྟེན་འདིར་མི་མང་པོ་ཞིག་ལ་རྫུན་མའི་བློ་ཁོག་ཡོད། སྲིད་དོན་མཁས་པར་རྫུན་མའི་བློ་ཁོག་ཡོད་ལ། འདེམས་བསྐོ་བྱེད་མཁན་གྱིས་རང་ཉིད་ལ་དབང་ཚད་དང་གོ་ས་གནས་བབ་ཐོབ་ཆེད་དུ་དངུལ་འབོར་ཆེན་འགྲོ་གྲོན་གཏོང་བ་སོགས་རེད། ང་ཚོས་ཞི་མི་དང་རི་བོང་མ་ནོར་བ་བྱེད་དགོས།

བློ་ཁོག་དངོས་ནི་གཞན་ཕན་ཁོ་ན་ཡིན། འོན་ཀྱང་སྲིད་དོན་གྱི་ཝ་མོ་དང་མ་རབས་ཚོང་པ་ཕྱུག་པོ། བུད་མེད་ལ་ཆགས་པའི་འདོད་ལོག་ཅན་ལ་སོགས་པའི་རྫུན་མའི་བློ་ཁོག་དང་ནོར་སླ།

ང་ཚོས་སེམས་གཏིང་ནས་བློ་ཁོག་ཆེན་པོ་བྱེད་དགོས། བློ་ཁོག་དངོས་གནས་ནི་བློ་ཡིས་བསམ་བློ་གཏོང་བ་མ་ཡིན་པར། བློ་ཁོག་ངོ་མ་ནི་སེམས་ཀྱི་དྲི་ཞིམ་ཞིག་ཡིན།

གལ་ཏེ་མི་རྣམས་ལ་བློ་ཁོག་ཡོད་ན། སེམས་ལ་བསགས་པའི་བསམ་ངན་ཚང་མ་བརྗེད་དེ་སྡུག་བསྔལ་གྱི་ཉམས་མྱོང་ཡོད་ཚད་བརྗེད་ནས་དུས་ནས་དུས་སུ་སྐྱེལ་བ་དང་རྟག་པར་སྐྱིད་པ། རྟག་པར་བློ་ཁོག་ཆེན་པོ། དངོས་གནས་ཀྱི་དྲང་བདེན་གྱིས་ཁེངས་ཏེ་འཚོ་བ་སྐྱེལ་ཤེས།

བདག་ནི་འདས་པའི་དོན་ཡིན་ལ་རྟག་པར་འདས་པར་འགྲོ་འདོད་ཡོད། འདས་པས་མི་རྣམས་མེད་པར་བཟོ་ཞིང་བདེ་སྐྱིད་བརླག་པར་བཏང་སྟེ་བྱམས་པ་བསད་དོ།

འདས་པའི་ནང་ལྷག་བསྡད་པའི་བློས་ང་ཚོས་འཚོ་བ་སྐྱེལ་བའི་དུས་ཚོད་ཀྱི་ནང་དོན་ཆ་ཚང་རྟོགས་མི་ཐུབ།

མི་མང་པོ་ཞིག་གིས་སེམས་གསོ་འཚོལ་བ་དང་སེམས་སྡུག་སེལ་བའི་སྨན་ལེགས་བསྟེན་འདོད་ཀྱིས་ཡི་གེ་འབྲི་མོད། འོན་ཀྱང་སྡུག་བསྔལ་མྱོང་མཁན་ལ་སེམས་གསོ་བྱེད་མཁན་ནི་ཉུང་ཤས་རེད།

མི་མང་པོ་ཞིག་གིས་ང་ཚོར་སྡུག་བསྔལ་གྱི་གནས་སྟངས་ངན་པ་རྣམས་བཤད་དེ་ཡི་གེ་འབྲི་ཡང་ཁོ་ཚོར་ཟས་མེད་པའི་དབང་གིས་དཀའ་ངལ་འཕྲད་ཀྱང་གཞན་དགོས་མཁོ་ཡོད་མཁན་ལ་ཟས་སྐལ་ཕྱེད་ཀ་བྱེད་མཁན་ནི་ཧ་ཅང་དཀོན།

མི་རྣམས་ཀྱིས་འབྲས་བུ་ཚང་མའི་རྒྱབ་ཏུ་རྐྱེན་ཞིག་ཡོད་ལ་རྐྱེན་བསྒྱུར་བཅོས་བྱས་ཚེ་འབྲས་བུ་བསྒྱུར་བཅོས་བྱེད་ཐུབ་པའི་དོན་དེ་ཤེས་འདོད་མེད།

བདག་གིས་སྔོན་ཆད་ཀྱི་རྐྱེན་ངན་བསླངས་ཏེ་དེའི་འབྲས་བུས་ང་ཚོའི་གནས་བབ་ལ་འགོག་རྐྱེན་བཟོས་ཡོད།

ང་ཚོས་རྐྱེན་བསྒྱུར་བཅོས་དང་འབྲས་བུ་བསྒྱུར་བཅོས་བྱེད་པར་བློ་ཁོག་དགོས། ང་ཚོས་རང་ཉིད་ཀྱི་མི་ཚེའི་གྲུ་གཟིངས་ལ་བདག་པོར་རྒྱག་དགོས།

ང་ཚོས་རང་ཉིད་ཀྱི་མི་ཚེ་རྦད་དེ་བསྒྱུར་བཅོས་བྱེད་པར་བློ་ཁོག་དགོས།

ནུས་པ་ལྡན་པའི་བློ་ཁོག་ནི་བསམ་བློའི་འཁྱེར་སོ་ཞིག་མིན་ལ། སྙིང་རྗེ་དང་དགའ་ཞེན་དངོས་གནས་ནི་འཇིགས་སྐྲག་གི་འབྲས་བུ་ཞིག་ཡིན་མི་སྲིད།

འཇིགས་སྐྲག་གིས་སྙིང་རྗེ་མེད་པར་བཟོ་བ་དང་སེམས་ཀྱི་བློ་ཁོག་བརླག་པར་བཏང་སྟེ་ང་ཚོའི་ནང་གི་བྱམས་པའི་དྲི་ཞིམ་སྡུག་པོ་རྣམས་མེད་པར་བཟོ་བའི་དོན་དེ་ངེས་པར་དུ་རྟོགས་དགོས།

འཇིགས་སྐྲག་ནི་ལྐོག་ཟ་ཚང་མའི་རྩ་བ་དང་དམག་འཁྲུག་ཚང་མའི་གསང་བའི་འབྱུང་ཁུངས། མི་བཟང་མི་ངན་དུ་འགྱུར་བ་དང་འཆི་བའི་དུག་རྫས་རེད།

སློབ་གྲྭ་ཆེ་འབྲིང་དང་གཙུག་ལག་སློབ་གྲྭའི་དགེ་རྒན་རྣམས་ཀྱིས་སློབ་མ་རྣམས་བློ་ཁོག་དངོས་དང་སེམས་ཀྱི་དཔའ་སྤོབས་བདེན་པ་ཅན་གྱི་ལམ་ལ་འཁྲིད་དགོས་པའི་དོན་དེ་རྟོགས་དགོས།

མི་རབས་སྔོན་མའི་ལྐུགས་པ་དང་བླུན་པོ་ཚོས་འཇིགས་སྐྲག་གི་དུག་གི་ངོ་བོ་མ་རྟོགས་པར་དེ་ནི་དྲོད་ཁང་གི་མེ་ཏོག་ལྟར་གསོས་པ་རེད། བྱེད་སྟངས་དེ་འདྲའི་འབྲས་བུ་ནི་ལྐོག་ཟ་དང་ཟང་ཟིང་། གོ་རིམ་མེད་པ་སོགས་རེད།

དགེ་རྒན་རྣམས་ཀྱིས་ང་ཚོས་འཚོ་བ་སྐྱེལ་བའི་དུས་ཚོད་དང་ང་ཚོས་གནས་བབ་ཉག་ཕྲ་བོ་གང་འདྲ་ཞིག་ཏུ་སླེབས་མིན་རྟོགས་ཏེ། བསམ་བློའི་ངར་སྐད་ཀྱི་འུར་སྒྲའི་ཁྲོད་ན་སྡུག་བསྔལ་དང་ན་ཟུག་གི་དུས་ཚོད་ནང་དུ་འགོ་འཛུགས་བྱེད་བཞིན་པའི་རྡུལ་ཕྲན་གྱི་དུས་རབས་དང་མཐུན་པའི་གསར་བརྗེའི་བཟང་སྤྱོད་ཀྱི་རྨང་གཞིའི་སྟེང་མི་རབས་གསར་པ་སྐྱེད་སྲིང་བྱེད་དགོས།

སློབ་གསོའི་རྩ་བའི་རྨང་གཞི་ནི་དུས་རབས་གསར་པའི་འགྱུར་བའི་འགྲོས་དང་མཐུན་པའི་སེམས་ཁམས་རིག་པའི་གསར་བརྗེ་དང་བཟང་སྤྱོད་ཀྱི་གསར་བརྗེ་ཡིན།

མཉམ་ལས་ཀྱི་འདུ་ཤེས་ཀྱིས་རང་གཅིག་འདོད་རྔམ་ཅན་གྱི་འགྲན་རྩོད་ཀྱི་དམག་འཁྲུག་ཡ་ང་བ་དེ་རྦད་དེ་མེད་པར་བཟོ་དགོས། ནུས་པ་ལྡན་པའི་གསར་བརྗེའི་བློ་ཁོག་གི་རྩ་དོན་གྱི་རིགས་དབྱེ་མེད་ན་མཉམ་ལས་བྱེད་ཐབས་མེད།

བློ་ཡི་རིམ་པ་ཙམ་དུ་མ་ཟད་ད་དུང་ཡིད་མི་ཤེས་པ་དང་འོག་སེམས་ཀྱི་གབ་སྦེད་བྱེད་སའི་གནས་སུ་བློ་ཁོག་མེད་པ་དང་རང་གཅིག་འདོད་རྔམ་ཅན་གྱི་དོན་ཡ་ང་བ་གང་ཡིན་པ་དེ་ཆ་ཚང་རྟོགས་པ་དེ་ནི་ཧ་ཅང་ཛ་དྲག་ཆེ། རང་ཉིད་ཀྱི་རང་གཅིག་འདོད་རྔམ་ཅན་དང་བློ་ཁོག་མེད་པའི་དོན་ཤེས་པ་ཙམ་གྱིས་སེམས་ནང་ནས་དྲི་ཞིམ་སྡུག་པའི་བྱམས་པ་དངོས་དང་བློ་ཡིས་མི་སེམས་པའི་ནུས་པ་ལྡན་པའི་བློ་ཁོག་དེ་འབྱུང་ངོ་།