བདེ་འཇགས་འཚོལ་བ།

བྱ་ཕྲུག་ཚོར་འཇིགས་སྐྲག་སྐྱེས་དུས་བྱ་མོའི་གཤོག་འོག་ཏུ་བདེ་འཇགས་འཚོལ་བར་འཛུལ་བསྡད་ཀྱི་རེད།

བྱིས་པ་སྐྲག་སྣང་སྐྱེས་པ་དེ་ཨ་མའི་རྩར་བརྒྱུགས་ཏེ་འགྲོ་གི་རེད། ག་རེ་ཟེར་ན། ཨ་མའི་འགྲམ་ལ་སྡོད་དུས་རང་ཉིད་བདེ་འཇགས་ཡོད་པའི་ཚོར་སྣང་སྐྱེས་ཀྱི་རེད།

དེས་ན་འཇིགས་སྐྲག་དང་བདེ་འཇགས་འཚོལ་བ་གཉིས་ནི་ནམ་ཡང་འབྲལ་ཐབས་མེད་པ་ཞིག་ཡིན་པ་ར་སྤྲོད་བྱས་ཡོད།

མི་རྒོད་ཚོའི་འཇིགས་སྐྲག་འོག་ཏུ་ལྷུང་སྟེ་རྐུ་འཕྲོག་བྱེད་མཁན་ཡོང་སྲིད་པའི་དོགས་པ་བྱེད་མཁན་གྱི་མི་ཞིག་གིས་རང་ཉིད་ཀྱི་མེ་མདའ་ནང་ནས་བདེ་འཇགས་འཚོལ་གྱི་རེད།

རྒྱལ་ཁབ་གཞན་ཞིག་གིས་རང་ཉིད་ལ་དྲག་སྤྱོད་སྤེལ་སྲིད་པའི་འཇིགས་པ་སྐྱེས་པའི་རྒྱལ་ཁབ་ཅིག་གིས་མེ་སྒྱོགས་དང་གནམ་གྲུ། དམག་གྲུ་སོགས་ཉོ་སྒྲུབ་བྱས་ཏེ་དམག་མི་སྒྲིག་འཛུགས་དང་དམག་འཁྲུག་གི་གྲ་སྒྲིག་བྱེད་ཀྱི་རེད།

ལས་ཀ་བྱེད་ཤེས་ཀྱི་མེད་པའི་མི་མང་པོ་ཞིག་དབུལ་ཕོངས་ཀྱི་འཇིགས་སྣང་འོག་ཏུ་ཚུད་དེ་ནག་ཉེས་ནང་ནས་བདེ་འཇགས་འཚོལ་གྱི་རེད། དེ་ཚོ་རྐུན་མ་དང་འཕྲོག་བཅོམ་བྱེད་མཁན་སོགས་ལ་འགྱུར་གྱི་རེད།

བློ་རིག་ཞན་པའི་བུད་མེད་མང་པོ་ཞིག་དབུལ་ཕོངས་ཀྱི་ཉེན་ཁའི་འོག་ཏུ་འཇིགས་སྐྲག་སྐྱེས་ཏེ་སྨད་འཚོང་མ་ཆགས་ཀྱི་རེད།

ཁྱོ་ག་ཕྲག་དོག་ཅན་ཞིག་གིས་རང་གི་བཟའ་ཟླ་ཤོར་འགྲོ་བའི་དོགས་པ་བྱེད་ཀྱི་རེད། དེས་མེ་མདའི་ནང་ནས་བདེ་འཇགས་འཚོལ་གྱི་རེད། མཐར་གསོད་པ་དང་བཙོན་ཁང་ནང་འགྲོ་གི་རེད།

བུད་མེད་ཕྲག་དོག་ཅན་ཞིག་གིས་རང་ཉིད་ཀྱི་འགྲན་ཟླ་ཡང་ན་ཁྱོ་ག་གསོད་ཀྱི་རེད། དེ་འདྲ་བྱས་ནས་མི་གསོད་མཁན་ཞིག་ཏུ་འགྱུར་གྱི་རེད།

མོས་རང་གི་ཁྱོ་ག་ཤོར་འགྲོ་བའི་དོགས་པ་བྱེད་ཀྱི་རེད། དེས་ཁྱོ་ག་བརྟན་པོ་བཟོ་བསམ་པའི་དམིགས་ཡུལ་འོག་ནས་གཞན་ལ་གནོད་འཚེ་བཏང་སྟེ་གསོད་པའམ་ཡང་ན་རང་ཉིད་ཀྱིས་ཁྱོ་ག་གསོད་རྒྱུའི་ཐག་གཅོད་བྱེད་ཀྱི་རེད།

ཁང་བདག་འཇིགས་སྣང་ཅན་ཞིག་གིས་མི་ཚོས་ཁང་གླ་སྤྲོད་ཀྱི་མ་རེད་བསམ་པའི་དོགས་པ་བྱེད་ཀྱི་རེད། དེས་གན་རྒྱ་དང་འགན་ལེན་པ། འཛོག་དངུལ་སོགས་འདོན་དགོས་པའི་བླང་དོར་བྱེད་ཀྱི་རེད། དེ་འདྲ་བྱས་ནས་ཁོ་རང་བདེ་འཇགས་བཟོ་བསམ་གྱི་རེད། གལ་ཏེ་ཕྲུ་གུ་མང་པོ་ཡོད་པའི་ཁྱིམ་ཚང་ཞིག་གིས་དེ་འདྲའི་བླང་དོར་ཚང་མ་སྐོང་ཐུབ་ཀྱི་མེད་པ་དང་། གྲོང་ཁྱེར་གྱི་ཁང་བདག་ཚང་མས་དེ་འདྲ་བྱས་པ་ཡིན་ན། མཐའ་མཇུག་ཏུ་སྐྱོ་སྣང་ཅན་གྱི་ཨ་མ་དེས་རང་གི་ཕྲུ་གུ་ཚོ་དང་ལྷན་དུ་སྲང་ལམ་མམ་གྲོང་ཁྱེར་གྱི་སྤྱི་གླིང་ནང་ཉལ་དགོས་ཆགས་ཀྱི་རེད།

དམག་འཁྲུག་ཚང་མ་འཇིགས་སྐྲག་ལས་བྱུང་བ་རེད།

གེ་སི་ཊ་པོ་དང་མནར་གཅོད་གཏོང་སའི་ཁང་པ། བཙོན་སྒར། སི་བེ་རི་ཡ། བཙོན་ཁང་འཇིགས་སུ་རུང་བ། རྒྱང་འབུད། ངལ་རྩོལ་བཙན་བཀོལ། མེ་མདས་གསོད་པ་སོགས་ཚང་མ་འཇིགས་སྐྲག་ལས་བྱུང་བ་རེད།

རྒྱལ་ཁབ་ཁག་གིས་འཇིགས་སྐྲག་གི་དབང་གིས་རྒྱལ་ཁབ་གཞན་ལ་དྲག་སྤྱོད་སྤེལ་གྱི་རེད། དྲག་སྤྱོད་ཀྱི་ནང་ནས་བདེ་འཇགས་འཚོལ་གྱི་རེད། གསོད་པ་དང་བཙན་འཛུལ་བྱས་ཚེ་བདེ་འཇགས་དང་སྟོབས་ཤུགས་ཅན། དབང་ཆ་ཅན་ལ་འགྱུར་ཐུབ་བསམ་གྱི་རེད།

གསང་བའི་ཉེན་རྟོག་ལས་ཁུངས་དང་གསང་མྱུལ་ལས་ཁུངས་སོགས་ཀྱི་ནང་དུ། ཤར་ཕྱོགས་སམ་ནུབ་ཕྱོགས་གང་ཡིན་རུང་གསང་མྱུལ་ལ་མནར་གཅོད་གཏོང་གི་རེད། དེ་ཚོར་འཇིགས་པ་སྐྱེས་ཏེ་ངག་བརྡ་ལེན་ནས་རྒྱལ་ཁབ་ཀྱི་བདེ་འཇགས་འཚོལ་གྱི་རེད།

ནག་ཉེས་ཚང་མ་དང་དམག་འཁྲུག་ཚང་མ། དམར་གསོད་ཚང་མ་འཇིགས་སྐྲག་དང་བདེ་འཇགས་འཚོལ་བ་ལས་བྱུང་བ་རེད།

སྔོན་མ་མི་ཚོའི་བར་ལ་དྲང་བདེན་གྱི་འབྲེལ་བ་ཡོད་པ་རེད། དེང་སང་འཇིགས་སྐྲག་དང་བདེ་འཇགས་འཚོལ་བ་གཉིས་ཀྱིས་དྲང་བདེན་གྱི་དྲི་ཞིམ་རྨད་དུ་བྱུང་བ་དེ་མེད་པ་བཟོས་ཚར་བ་རེད།

གྲོགས་པོས་གྲོགས་པོར་ཡིད་ཆེས་བྱེད་ཀྱི་མེད། རྐུ་འཕྲོག་བྱེད་ཀྱི་རེད་དམ་བསམ་པ་དང་གཡོ་སྒྱུ་བྱེད་ཀྱི་རེད་དམ་བསམ་པ། བཤུ་གཞོག་གཏོང་གི་རེད་དམ་བསམ་པ་སོགས་ཀྱི་དོགས་པ་བྱེད་ཀྱི་རེད། ཐ་ན་བླུན་པོ་དང་གདུག་རྩུབ་ཅན་གྱི་གཏམ་དཔེ་འདི་འདྲ་ཡང་ཡོད་པ་རེད། “ནམ་ཡང་ཁྱེད་ཀྱི་གྲོགས་པོ་བཟང་ཤོས་ལ་རྒྱབ་ཕྱོགས་སྟོན་མི་རུང་” ཧི་ཊི་ལེར་གྱི་རྗེས་འཇུག་པ་ཚོས་གཏམ་དཔེ་འདི་གསེར་ལས་ལྷག་པ་ཞིག་རེད་ཟེར་གྱི་རེད།

ད་ནི་གྲོགས་པོས་གྲོགས་པོར་འཇིགས་པ་སྐྱེས་ཀྱི་རེད། ཐ་ན་རང་ཉིད་སྲུང་སྐྱོབ་བྱེད་ཆེད་གཏམ་དཔེ་ཡང་བེད་སྤྱོད་གཏོང་གི་རེད། ད་ནི་གྲོགས་པོ་ཚོའི་བར་ལ་དྲང་བདེན་མེད། འཇིགས་སྐྲག་དང་བདེ་འཇགས་འཚོལ་བ་གཉིས་ཀྱིས་དྲང་བདེན་གྱི་དྲི་ཞིམ་སིམ་པ་དེ་མེད་པ་བཟོས་ཚར་བ་རེད།

ཀིའུ་བྷའི་ནང་གི་ཀ་སི་ཊོ་རུ་སི་ཡིས་མི་སྟོང་ཕྲག་མང་པོར་མེ་མདས་བརྒྱབ་སྟེ་གསོད་ཀྱི་རེད། དེ་ནི་ཁོ་རང་འཇིགས་སྐྲག་འོག་ཏུ་ཚུད་དེ་མི་ཚོས་ཁོ་རང་ལ་གནོད་སྐྱེལ་གྱི་རེད་བསམ་ནས་རེད། ཀ་སི་ཊོ་རུ་སི་ཡིས་མེ་མདས་བརྒྱབ་སྟེ་གསོད་པ་དེས་བདེ་འཇགས་འཚོལ་གྱི་རེད། ཁོས་དེ་འདྲ་བྱས་ན་བདེ་འཇགས་འཚོལ་ཐུབ་བསམ་གྱི་རེད།

སི་ཊ་ལིན་གདུག་རྩུབ་ཅན་དང་ཁྲག་དྲི་ཁ་བའི་སི་ཊ་ལིན་གྱིས་ཁྲག་གི་དྲི་མ་ཁ་བའི་སྒོ་ནས་རུ་སི་ཡ་ཡོངས་ལ་སུན་སྣང་སྐྱེ་རུ་བཅུག་པ་རེད། དེ་ནི་ཁོ་རང་གི་བདེ་འཇགས་འཚོལ་བའི་ཐབས་ལམ་ཞིག་རེད།

ཧི་ཊི་ལེར་གྱིས་གེ་སི་ཊ་པོ་སྟེ། གེ་སི་ཊ་པོ་འཇིགས་སུ་རུང་བ་དེ་རྒྱལ་ཁབ་ཀྱི་བདེ་འཇགས་ཆེད་དུ་བཙུགས་པ་རེད། ཁོ་ལ་ཁོ་རང་གི་གོ་གནས་ནས་ཕབ་ཀྱི་རེད་བསམ་པའི་འཇིགས་སྐྲག་སྐྱེས་པ་ལ་ཐེ་ཚོམ་མེད། དེའི་དབང་གིས་ཁྲག་གི་དྲི་མ་ཁ་བའི་གེ་སི་ཊ་པོ་ཞིག་བཙུགས་པ་རེད།

འཇིག་རྟེན་འདིའི་སྡུག་བསྔལ་ཚང་མ་འཇིགས་སྐྲག་དང་བདེ་འཇགས་འཚོལ་བ་ལས་བྱུང་བ་རེད།

སློབ་གྲྭའི་དགེ་རྒན་དང་དགེ་མའི་རྣམ་པ་ཚོས་སློབ་ཕྲུག་ཚོར་སྙིང་སྟོབས་ཀྱི་བཟང་སྤྱོད་སློབ་དགོས།

ཕྲུ་གུ་ཆུང་ཆུང་ཚོའི་སེམས་ལ་ཁྱིམ་ཚང་ནང་ནས་འཇིགས་སྐྲག་གིས་བཀང་བ་ནི་ཧ་ཅང་སྐྱོ་བ་ཞིག་རེད།

བྱིས་པ་ཆུང་ཆུང་ཚོར་འཇིགས་སྐྲག་སློང་བ་དང་བཙན་ཤེད་བྱེད་པ། སྡིགས་ར་རྒྱག་པ་སོགས་བྱེད་ཀྱི་རེད།

ཕ་མ་དང་དགེ་རྒན་ཚོས་བྱིས་པ་ཆུང་ཆུང་དང་གཞོན་ནུ་ཚོར་སློབ་སྦྱོང་བྱེད་དགོས་པའི་ཆེད་དུ་འཇིགས་སྐྲག་སློང་བ་ནི་གོམས་སྲོལ་ཞིག་ཏུ་གྱུར་ཡོད།

སྤྱིར་བཏང་བྱིས་པ་ཆུང་ཆུང་དང་གཞོན་ནུ་ཚོར་སློབ་སྦྱོང་མ་བྱས་ན་སློང་མོ་བྱེད་དགོས་ཆགས་ཀྱི་རེད་དམ་ཡང་ན་སྲང་ལམ་ནང་ལྟོགས་ཤི་ཐེབས་ཀྱི་རེད་ཟེར་བ་དང་། ལས་ཀ་དམན་པ་ལྷམ་འཕྱི་བ་དང་ཟོག་འདྲུད་པ། ཚགས་པར་བཙོང་བ་དང་ཞིང་ལས་བྱེད་པ་སོགས་བྱེད་དགོས་ཀྱི་རེད་ཟེར་གྱི་རེད། (ལས་ཀ་བྱེད་པ་ནི་ནག་ཉེས་ཤིག་ཡིན་པ་ལྟ་བུ།)

དོན་དངོས་སུ་ཕ་མ་དང་དགེ་རྒན་ཚོའི་གཏམ་ཚང་མའི་རྒྱབ་ཏུ་རང་གི་ཕྲུ་གུ་ལ་སེམས་ཁྲལ་ཡོད་པ་དང་ཕྲུ་གུའི་ཆེད་དུ་བདེ་འཇགས་འཚོལ་གྱི་ཡོད་པ་རེད།

ང་ཚོས་བཤད་བཞིན་པའི་གནད་དོན་འདི་དག་གི་ནང་ནས་ཛ་དྲག་ཆེ་ཤོས་ནི་བྱིས་པ་ཆུང་ཆུང་དང་གཞོན་ནུ་ཚོ་ལ་ཞུམ་པ་སྐྱེས་པ་དང་སེམས་ལ་འཇིགས་སྐྲག་གིས་བཀང་སྟེ་རྗེས་སུ་དངོས་ཡོད་ཀྱི་འཚོ་བའི་ནང་འཇིགས་སྐྲག་གིས་ཁེངས་པའི་མི་ཞིག་ཏུ་འགྱུར་གྱི་ཡོད་པ་དེ་རེད།

བྱིས་པ་ཆུང་ཆུང་དང་གཞོན་ནུ་ཚོར་འཇིགས་སྐྲག་སློང་བའི་བློ་ཡུལ་དོག་པའི་ཕ་མ་དང་དགེ་རྒན་ཚོས་དྲན་པ་མེད་པའི་སྒོ་ནས་ཁོ་ཚོ་ནག་ཉེས་ཀྱི་ལམ་ལ་ཁྲིད་ཀྱི་ཡོད་པ་རེད། ག་རེ་ཟེར་ན། ང་ཚོས་སྔོན་ནས་བཤད་པ་ལྟར་ནག་ཉེས་ཚང་མ་འཇིགས་སྐྲག་དང་བདེ་འཇགས་འཚོལ་བ་ལས་བྱུང་བ་རེད།

དེང་སང་འཇིགས་སྐྲག་དང་བདེ་འཇགས་འཚོལ་བ་གཉིས་ཀྱིས་འཛམ་བུ་གླིང་འདི་དམྱལ་ཁམས་འཇིགས་སུ་རུང་བ་ཞིག་ཏུ་བསྒྱུར་ཚར་བ་རེད། ཚང་མས་འཇིགས་པ་སྐྱེས་ཀྱི་རེད། ཚང་མས་བདེ་འཇགས་འཚོལ་གྱི་རེད།

སྔོན་མ་རང་དབང་ངང་འགྲོ་འོང་བྱེད་ཆོག་པ་རེད། དེང་སང་ས་མཚམས་ཁག་ཏུ་དམག་མི་མང་པོས་མཚོན་ཆ་ཐོགས་ནས་སྡོད་ཀྱི་རེད། རྒྱལ་ཁབ་གཅིག་ནས་གཅིག་ཏུ་འགྲོ་བའི་ཐོབ་ཐང་ཡོད་ཆེད་ལམ་ཡིག་དང་ལག་ཁྱེར་སྣ་ཚོགས་འདོན་དགོས་ཀྱི་རེད།

འདི་ཚང་མ་འཇིགས་སྐྲག་དང་བདེ་འཇགས་འཚོལ་བའི་འབྲས་བུ་རེད། འགྲོ་འོང་བྱེད་མཁན་ཚོར་འཇིགས་པ་སྐྱེས་ཀྱི་རེད། འབྱོར་མཁན་ཚོར་འཇིགས་པ་སྐྱེས་ཀྱི་རེད། ལམ་ཡིག་དང་ཡིག་ཆ་སྣ་ཚོགས་ནང་ནས་བདེ་འཇགས་འཚོལ་གྱི་རེད།

སློབ་གྲྭའི་དགེ་རྒན་དང་དགེ་མ། མཐོ་སློབ་ཀྱི་དགེ་རྒན་ཚོས་གནད་དོན་འདི་ཚང་མའི་འཇིགས་སུ་རུང་བའི་རང་བཞིན་རྟོགས་ཏེ་འཛམ་བུ་གླིང་གི་བདེ་དོན་ཆེད་ལས་འགུལ་སྤེལ་དགོས། དེ་ཡང་མི་རབས་གསར་པ་ཚོར་སློབ་གསོ་སྤྲད་དེ་བདེན་པའི་སྙིང་སྟོབས་ཀྱི་ལམ་ལ་སློབ་ཁྲིད་བྱེད་དགོས།

མི་རབས་གསར་པ་ཚོར་འཇིགས་པ་མི་སྐྱེས་པ་དང་སུ་ལའང་བདེ་འཇགས་འཚོལ་མི་དགོས་པ་སློབ་ཁྲིད་བྱེད་རྒྱུ་ནི་ཧ་ཅང་ཛ་དྲག་རེད།

མི་སྒེར་རེ་ངོས་ནས་རང་ཉིད་ལ་ཡིད་ཆེས་བྱེད་ཤེས་དགོས་པ་ཧ་ཅང་གལ་ཆེན་པོ་རེད།

འཇིགས་སྐྲག་དང་བདེ་འཇགས་འཚོལ་བ་ནི་འཇིག་རྟེན་འདི་དམྱལ་ཁམས་འཇིགས་སུ་རུང་བ་ཞིག་ཏུ་བསྒྱུར་བའི་ཞན་ཆ་འཇིགས་སུ་རུང་བ་ཞིག་རེད།

གང་སར་ཞེད་སྣང་ཅན་དང་འཇིགས་སྐྲག་ཅན། ཞན་པོ་ཚོས་ནམ་ཡང་བདེ་འཇགས་འཚོལ་གྱི་རེད།

འཚོ་བར་འཇིགས་པ་སྐྱེས་པ་དང་འཆི་བར་འཇིགས་པ་སྐྱེས། གཞན་གྱིས་ག་རེ་ཟེར་གྱི་རེད་བསམ་པ་དང་ “འདི་འདྲ་ཟེར་གྱི་རེད་” ཟེར་བ་དང་། སྤྱི་ཚོགས་ཀྱི་གོ་གནས་དང་སྲིད་དོན་གྱི་གོ་གནས། མཚན་སྙན། དངུལ། ཁང་པ་ཡག་པོ། བཟའ་ཟླ་ཡག་པོ། ཁྱོ་ག་ཡག་པོ། ལས་ཀ ཚོང་ལས། བདག་དབང་སྒེར་འཛིན། ཅ་དངོས། རླངས་འཁོར་སོགས་ཚང་མར་འཇིགས་པ་སྐྱེས་ཀྱི་རེད། ཞེད་སྣང་ཅན་དང་འཇིགས་སྐྲག་ཅན། ཞན་པོ་ཚོ་གང་སར་མང་པོ་ཡོད་ཀྱང་སུས་ཀྱང་རང་ཉིད་ཞེད་སྣང་ཅན་དང་འཇིགས་སྐྲག་ཅན་ཡིན་པ་ཁས་ལེན་གྱི་མ་རེད། ཚང་མས་རང་ཉིད་སྟོབས་ཤུགས་ཅན་དང་སྙིང་སྟོབས་ཅན་ཡིན་པ་སོགས་བཤད་ཀྱི་རེད།

སྤྱི་ཚོགས་ཀྱི་རིམ་པ་ཚང་མའི་ནང་དུ་ཤོར་འགྲོ་བའི་དོགས་པ་ཡོད་པའི་ཁེ་ཕན་ས་ཡ་མང་པོ་ཡོད་པ་དང་། དེའི་དབང་གིས་འཇིག་རྟེན་ཡོངས་ནས་བདེ་འཇགས་འཚོལ་གྱི་རེད། དེ་ཚོ་ནི་རིམ་བཞིན་ཇེ་དཀའ་ཇེ་ཁག་ཏུ་འགྲོ་བཞིན་ཡོད་སྟབས། དངོས་ཡོད་ཀྱི་འཚོ་བ་དེ་བས་ཀྱང་རྙོག་འཛིང་ཅན་དང་དེ་བས་ཀྱང་དཀའ་ངལ་ཅན། དེ་བས་ཀྱང་ཁྲོ་བོ་དང་སྙིང་རྗེ་མེད་པར་འགྱུར་གྱི་རེད།

གཏམ་ངན་བཤད་པ་དང་སྙོན་འཛུགས། གཡོ་སྒྱུ་བྱེད་པ་སོགས་ཚང་མ་འཇིགས་སྐྲག་དང་བདེ་འཇགས་འཚོལ་བ་ལས་བྱུང་བ་རེད།

རྒྱུ་ནོར་དང་གོ་གནས། དབང་ཆ། མཚན་སྙན་མི་ཤོར་ཆེད་སྙོན་འཛུགས་དང་གཏམ་ངན་བཤད་དེ་མི་གསོད་པ། གསང་བའི་སྒོ་ནས་གསོད་མཁན་ལ་གླ་ཆ་སྤྲོད་པ་སོགས་བྱེད་ཀྱི་རེད།

འཛམ་བུ་གླིང་གི་དབང་ཤུགས་ཅན་ཚོས་རང་གི་མིང་དོན་མི་མཐུན་པ་དག་སེལ་ཆེད་དངུལ་མང་པོ་བཏང་སྟེ་ཁྲག་མང་པོ་བེད་སྤྱོད་གཏོང་གི་རེད།

ཁོ་ཚོས་དབང་ཆའི་དོན་དུ་དབང་ཆ་དགོས་ཀྱི་ཡོད་པ་དང་དངུལ་དང་ཁྲག་གི་སྟེང་ནས་དབང་ཆ་བརྟན་པོ་བཟོ་གི་རེད།

ཚགས་པར་ནང་རྒྱུན་པར་རང་སྲོག་བཅད་པའི་གནས་ཚུལ་མང་པོ་ཐོན་གྱི་རེད།

མང་པོ་ཞིག་གིས་རང་སྲོག་བཅད་མཁན་ནི་སྙིང་སྟོབས་ཅན་ཞིག་རེད་བསམ་གྱི་རེད། འོན་ཀྱང་དོན་དངོས་སུ་རང་སྲོག་གཅོད་མཁན་ནི་འཚོ་བར་འཇིགས་པ་སྐྱེས་པ་དང་འཆི་བདག་གི་ལག་པའི་ནང་ནས་བདེ་འཇགས་འཚོལ་བའི་ཞེད་སྣང་ཅན་ཞིག་རེད།

དམག་འཁྲུག་གི་དཔའ་བོ་ཁ་ཤས་སྟོབས་མེད་དང་ཞེད་སྣང་ཅན་གྱི་མི་ཞིག་ཡིན་པ་ཤེས་ཀྱི་རེད། འོན་ཀྱང་ཁོ་ཚོས་འཆི་བ་དང་མཇལ་དུས། ཁོ་ཚོར་འཇིགས་པ་ཧ་ཅང་ཆེན་པོ་སྐྱེས་ཏེ་རང་ཉིད་ཀྱི་འཚོ་བ་བརྟན་པོ་བཟོ་བསམ་པའི་བསམ་བློ་བཏང་སྟེ་འཆི་བར་འཐབ་རྩོད་བྱས་ནས་སྟོབས་ཤུགས་ཡོད་རྒུ་བཏོན་ནས་འབད་བརྩོན་བྱེད་ཀྱི་རེད། དེ་དུས་ཁོ་ཚོ་དཔའ་བོར་བསྒྲགས་པ་རེད།

འཇིགས་སྐྲག་ནི་སྙིང་སྟོབས་དང་འདྲེས་སླ་པོ་རེད། རང་སྲོག་བཅད་མཁན་ནི་སྙིང་སྟོབས་ཅན་ཞིག་དང་མེ་མདའ་ཁུར་མཁན་ཞིག་སྙིང་སྟོབས་ཅན་ཞིག་ཏུ་མཐོང་གི་རེད། འོན་ཀྱང་དོན་དངོས་སུ་རང་སྲོག་བཅད་མཁན་དང་མེ་མདའ་འཁྱེར་མཁན་དེ་ཚོ་ནི་ཧ་ཅང་ཞེད་སྣང་ཅན་རེད།

འཚོ་བར་འཇིགས་པ་མི་སྐྱེས་མཁན་ཞིག་གིས་རང་སྲོག་གཅོད་ཀྱི་མ་རེད། སུ་ལའང་འཇིགས་པ་མི་སྐྱེས་མཁན་ཞིག་གིས་མེ་མདའ་འཁྱེར་གྱི་མ་རེད།

སློབ་གྲྭའི་དགེ་རྒན་དང་དགེ་མའི་རྣམ་པ་ཚོས་གྲོང་མི་ཚོར་བདེན་པའི་སྙིང་སྟོབས་ནི་ག་རེ་ཡིན་པ་དང་འཇིགས་སྐྲག་ནི་ག་རེ་ཡིན་པ་གསལ་པོར་སློབ་ཁྲིད་བྱེད་རྒྱུ་ནི་ཧ་ཅང་ཛ་དྲག་རེད།

འཇིགས་སྐྲག་དང་བདེ་འཇགས་འཚོལ་བ་གཉིས་ཀྱིས་འཇིག་རྟེན་འདི་དམྱལ་ཁམས་འཇིགས་སུ་རུང་བ་ཞིག་ཏུ་བསྒྱུར་ཚར་བ་རེད།