དཀའ་ཚེགས་མེད

གསར་སྐྲུན་གྱི་རྟོགས་པ་རྒྱ་བསྐྱེད་གཏོང་རྒྱུ་ནི་ཧ་ཅང་གལ་ཆེ་ཞིང་མེད་དུ་མི་རུང་བ་ཞིག་ཡིན་ཏེ། རྒྱུ་མཚན་ནི་དེས་འགྲོ་བ་མི་ལ་འཚོ་བའི་རང་དབང་ངོ་མ་ཞིག་སྦྱིན་པའི་ཕྱིར། རྟོགས་པ་མེད་ན་དབྱེ་ཞིབ་གཏིང་ཟབ་ཀྱི་ནུས་པ་ངོ་མ་ཞིག་ཐོབ་མི་སྲིད།

སློབ་གྲྭ་དང་མཐོ་སློབ་དང་གཙུག་ལག་སློབ་གྲྭ་ཆེན་མོའི་དགེ་རྒན་རྣམས་ཀྱིས་རང་གི་སློབ་མ་རྣམས་རང་སྐྱོན་བརྟག་དཔྱད་ཀྱི་རྟོགས་པའི་ལམ་དུ་འཁྲིད་དགོས།

ང་ཚོས་ལེའུ་སྔོན་མའི་ནང་ཕྲག་དོག་གི་འགྲོ་རིམ་ལ་ཞིབ་འཇུག་རྒྱ་ཁྱབ་བྱས་ཟིན་ལ། གལ་ཏེ་ང་ཚོས་ཞེ་སྡང་གི་རྣམ་པ་ཡོངས་རྫོགས་མཐའ་དག་མེད་པར་བཟོ་འདོད་ན། དེ་དག་ནི་ཆོས་ལུགས་དང་། འདོད་ཆགས་སོགས་གང་ཡིན་ཡང་རུང་། ང་ཚོས་ཕྲག་དོག་ནི་དོན་དངོས་ཐོག་ཅི་ཞིག་ཡིན་མིན་ལ་གསལ་རྟོགས་ཆ་ཚང་ཞིག་བསྐྱེད་དགོས། རྒྱུ་མཚན་ནི་ཕྲག་དོག་གི་འགྲོ་རིམ་མཐའ་མེད་དེ་གཏིང་ཟབ་དང་དམ་པའི་ཚུལ་དུ་རྟོགས་ན་ད་གཟོད་ང་ཚོས་ཞེ་སྡང་གི་རིགས་ཡོངས་རྫོགས་མེད་པར་བཟོ་ཐུབ།

ཞེ་སྡང་གིས་གཉེན་སྒྲིག་འཇིག་གི་རེད། ཞེ་སྡང་གིས་མཛའ་གྲོགས་འཇིག་གི་རེད། ཞེ་སྡང་གིས་ཆོས་ལུགས་ཀྱི་དམག་འཁྲུག་བསླང་གི་རེད། སྤུན་ཟླའི་དམོད་མོའི་འཁོན་འཛིན། མི་གསོད། མནར་གཅོད་རིགས་སྣ་ཚོགས་བཟོ་ཡི་རེད།

རྣམ་པ་མཐའ་མེད་ཡོད་པའི་ཕྲག་དོག་ནི་དམིགས་ཡུལ་རླབས་ཆེན་གྱི་རྒྱབ་ཏུ་སྦས་ཡོད། གལ་ཏེ་མི་ཞིག་ལ་དམ་པའི་སྐྱེས་བུ་རླབས་ཆེན་ཡོད་པའི་སྐོར་གྱི་ཆ་འཕྲིན་འབྱོར་རྗེས་མི་དེས་ཀྱང་དམ་པ་ཞིག་བྱེད་འདོད་ན། ཕྲག་དོག་ཡོད། ཕན་བདེའི་ལས་ལ་འབད་པ་བྱེད་མཁན་དེ་གཞན་ལས་ལྷག་པ་ཞིག་བྱེད་འདོད་ན་ཕྲག་དོག་ཡོད། སྤྱོད་བཟང་ལེགས་པའི་སྐོར་གྱི་ཆ་འཕྲིན་འབྱོར་བའི་རྐྱེན་གྱིས་ཡང་ན། ཁོའི་བློ་ངོར་སྤྱོད་བཟང་དང་ལྡན་པའི་སྐྱེས་བུ་དམ་པའི་སྐོར་གྱི་གནས་ཚུལ་ཡོད་པའི་རྐྱེན་གྱིས་ཡོན་ཏན་ལ་ཧམ་སེམས་འཆང་མཁན་གང་ཟག་ཚང་མའི་ནང་ཕྲག་དོག་ཡོད།

དམ་པ་ཞིག་བྱེད་པའི་འདོད་པ། སྤྱོད་བཟང་ལེགས་པ་ཞིག་བྱེད་པའི་འདོད་པ། རླབས་ཆེན་ཞིག་བྱེད་པའི་འདོད་པ་བཅས་ཀྱི་རྩ་བ་ནི་ཕྲག་དོག་རེད།

སྤྱོད་བཟང་དང་ལྡན་པའི་དམ་པ་ཚོས་གནོད་སྐྱོན་མང་པོ་བཟོས་ཡོད། ང་ཚོའི་བློ་ངོར་རང་ཉིད་དམ་པར་རྩི་མཁན་ཞིག་དྲན་ཡོང་།

ཐེངས་ཤིག་ལ་བཀྲེས་སྐོམ་གྱིས་མནར་བའི་སྙན་ངག་པ་ཞིག་ཁོང་གི་སྒོ་རྩར་ཐོན་ཏེ་ཁོང་གི་ལག་ཏུ་སྙན་ཚིག་མཛེས་པོ་ཞིག་བཞག་པ་ནི་ང་ཚོའི་གཏམ་རྒྱུད་ཀྱི་དམ་པ་དེར་ཆེད་དུ་ཕུལ་བ་ཞིག་རེད། སྙན་ངག་པས་རང་གི་ལུས་པོ་སྐམ་ཞིང་རྒས་པོར་གྱུར་བའི་ཆེད་དུ་ཟས་ཉོ་བའི་དངུལ་ཙམ་ཞིག་རེ་བ་བྱས་ཡོད།

སྙན་ངག་པས་བརྙས་བཅོས་ཤིག་འབྱུང་སྲིད་པ་རྩ་བ་ནས་བསམ་མ་མྱོང་། དམ་པ་དེས་སྙིང་རྗེ་དང་འཁྱོག་པའི་གདོང་ཅིག་བསྟན་ཏེ་སྒོ་བརྒྱབ་ནས་སྙན་ངག་པ་སྐྱོ་བོ་དེར་ “གྲོགས་པོ་ཁྱོད་འདི་ནས་ཕར་སོང་། ཡུན་རིང་། ཡུན་རིང་། ང་འདི་འདྲ་ལ་དགའ་པོ་མེད། ང་འཇིག་རྟེན་གྱི་ང་རྒྱལ་ལ་སྡང་། འཚོ་བ་འདི་ནི་སྒྱུ་མ་རེད། ང་དམན་ས་བཟུང་ཞིང་ཞི་དུལ་གྱི་ལམ་དུ་འགྲོ” ཞེས་བཤད། སྙན་ངག་པ་སྐྱོ་བོ་དེས་དངུལ་ཙམ་ཞིག་རེ་བ་བྱས་པ་ལས་དེའི་ཚབ་ཏུ་དམ་པ་དེའི་བརྙས་བཅོས་དང་། སེམས་ལ་གནོད་པའི་སྐད་ཆ། རྡོག་ཐོས་བཅས་ཐོབ་སྟེ་སེམས་སྡུག་གིས་ཁེངས་ཤིང་པི་ཝང་བཅག་སྟེ་ཁྲོམ་ལམ་དུ་དལ་མོ། དལ་མོ། དལ་མོ་བྱས་ནས་ཕྱིན།

མི་རབས་གསར་པ་རྣམས་རྟོགས་པ་ངོ་མའི་རྨང་གཞིའི་ཐོག་ལངས་དགོས་ཏེ། རྒྱུ་མཚན་ནི་དེ་ནི་གསར་སྐྲུན་གྱི་ནུས་པ་དང་ལྡན་པ་ཞིག་ཡིན་པའི་ཕྱིར།

དྲན་པ་དང་ཡིད་ལ་དྲན་པ་དག་ནི་གསར་སྐྲུན་གྱི་ནུས་པ་དང་མི་ལྡན། དྲན་པ་ནི་འདས་པའི་དུར་ས་རེད། དྲན་པ་དང་ཡིད་ལ་དྲན་པ་དག་ནི་འཆི་བ་རེད།

རྟོགས་པ་ངོ་མ་ནི་ཡོངས་སུ་གྲོལ་བའི་སེམས་ཁམས་ཀྱི་རྒྱུ་རྐྱེན་རེད།

དྲན་པའི་དྲན་རྟེན་གྱིས་ང་ཚོར་ནམ་ཡང་གྲོལ་བ་ངོ་མ་ཞིག་སྟེར་མི་སྲིད་དེ། རྒྱུ་མཚན་ནི་དེ་དག་འདས་པར་གཏོགས་ཤིང་དེར་བརྟེན་ནས་འཆི་བར་གྱུར་བའི་ཕྱིར།

རྟོགས་པ་ནི་འདས་པའི་དོན་དག་ཅིག་མིན་ལ་མ་འོངས་པའི་དོན་དག་ཅིག་ཀྱང་མིན། རྟོགས་པ་ནི་ང་ཚོས་འདི་དང་ད་ལྟ་འཚོ་བཞིན་པའི་སྐབས་དེར་གཏོགས། དྲན་པས་ནམ་ཡང་མ་འོངས་པའི་བསམ་ཚུལ་ཞིག་ཁྱེར་ཡོང་།

ཚན་རིག་དང་། མཚན་ཉིད་རིག་པ། སྒྱུ་རྩལ། ཆོས་ལུགས་བཅས་ལ་སློབ་སྦྱོང་བྱེད་རྒྱུ་ནི་ཧ་ཅང་ཛ་དྲག་ཅིག་ཡིན་མོད། འོན་ཀྱང་སློབ་སྦྱོང་དེ་དག་དྲན་པའི་བློ་དྲན་ལ་ཡིད་ཆེས་བྱེད་མི་རུང་སྟེ། རྒྱུ་མཚན་ནི་དེ་ནི་བློ་དྲན་བརྟན་པོ་ཞིག་མིན་པའི་ཕྱིར།

ཤེས་བྱ་དེ་དྲན་པའི་དུར་སའི་ནང་བཞག་ན་དོན་མེད། ང་ཚོས་རྟོགས་དགོས་པའི་ཤེས་བྱ་དེ་འདས་པའི་དོང་ནང་སྦས་ན་བླུན་པོ་རེད།

ང་ཚོས་ནམ་ཡང་སློབ་སྦྱོང་དང་། ཤེས་རབ། ཚན་རིག་བཅས་ལ་ངོ་རྒོལ་བྱེད་མི་སྲིད། འོན་ཀྱང་ཤེས་བྱའི་རིན་ཐང་བྲལ་བའི་རིན་པོ་ཆེ་དེ་དྲན་པའི་རུལ་སུངས་སུ་གྱུར་བའི་དུར་ཁྲོད་ཀྱི་དབུས་སུ་འཇོག་རྒྱུ་ནི་མི་འཚམ་པ་ཞིག་རེད།

སློབ་སྦྱོང་བྱེད་དགོས། ཞིབ་འཇུག་བྱེད་དགོས། དབྱེ་ཞིབ་བྱེད་དགོས། དེ་བས་ང་ཚོས་སེམས་ཀྱི་རིམ་པ་ཚང་མའི་ནང་རྟོགས་པར་བསམ་གཞིག་གཏིང་ཟབ་བྱེད་དགོས།

མི་སླ་མོ་ངོ་མ་ཞིག་ནི་རྟོགས་པ་གཏིང་ཟབ་དང་ལྡན་ཞིང་སེམས་སྟབས་བདེ་ཞིག་ཡོད།

འཚོ་བའི་ནང་གལ་ཆེ་བ་ནི་ང་ཚོས་དྲན་པའི་དུར་སའི་ནང་བསགས་ཡོད་པ་དེ་མིན་པར་བློ་རིག་གི་རིམ་པའི་ནང་ཙམ་དུ་མ་ཟད་ཡིད་ཤེས་འོག་མ་དང་ཡིད་ཤེས་ཀྱི་ཕྱི་རོལ་གྱི་ས་ཁྱབ་ཡོངས་ཀྱི་ནང་ང་ཚོས་རྟོགས་ཡོད་པ་དེ་རེད།

ཚན་རིག་དང་། ཤེས་རབ། འདི་དག་ནི་འཕྲལ་མར་རྟོགས་པའི་ནང་བསྒྱུར་དགོས། ཤེས་བྱ་དང་སློབ་སྦྱོང་དེ་དག་རྟོགས་པ་གསར་སྐྲུན་གྱི་ནང་བསྒྱུར་རྗེས་ང་ཚོས་དངོས་པོ་ཡོངས་རྫོགས་འཕྲལ་མར་རྟོགས་ཐུབ་སྟེ། རྒྱུ་མཚན་ནི་རྟོགས་པ་འཕྲལ་མར་འབྱུང་བའི་རྐྱེན་གྱིས་སོ།།

མི་སླ་མོ་དེར་སེམས་ཀྱི་ནང་རྙོག་འཛིང་མེད། རྒྱུ་མཚན་ནི་སེམས་ཀྱི་རྙོག་འཛིང་ཡོངས་རྫོགས་དྲན་པའི་རྐྱེན་གྱིས་ཡིན་པའི་ཕྱིར། ང་ཚོའི་ནང་ན་ཡོད་པའི་རང་གཞན་མགོ་སྐོར་གཏོང་མཁན་དེ་ནི་བསགས་པའི་དྲན་པ་རེད།

འཚོ་བའི་ཉམས་མྱོང་དེ་དག་རྟོགས་པ་ངོ་མའི་ནང་བསྒྱུར་དགོས།

ཉམས་མྱོང་དེ་རྟོགས་པའི་ནང་མ་བསྒྱུར་ན། ཉམས་མྱོང་དེ་དྲན་པའི་ནང་མུ་མཐུད་གནས་ན་དེ་ནི་དུར་སའི་རུལ་སུངས་སུ་གྱུར་ཅིང་དེའི་ཐོག་བློ་རིག་གི་མེ་ལྕེ་འབར་ཡོང་།

བློ་རིག་སེམས་ཅན་གྱི་བློ་རིག་དེ་ཆོས་ཉིད་ཡོངས་སུ་བྲལ་ཏེ་དྲན་པའི་ངག་གིས་བརྗོད་པ་ཙམ་དང་དུར་ས་སྟེང་གི་མར་མེ་འབར་བ་ཙམ་ཡིན་པ་ཤེས་དགོས།

མི་སླ་མོ་དེའི་སེམས་ཉམས་མྱོང་ལས་རང་དབང་ཐོབ་ཡོད་དེ། རྒྱུ་མཚན་ནི་དེ་དག་རྣམ་ཤེས་སུ་གྱུར་ཅིང་རྟོགས་པ་གསར་སྐྲུན་གྱི་ནང་བསྒྱུར་བའི་ཕྱིར།

འཆི་བ་དང་འཚོ་བ་དམ་པའི་ཚུལ་དུ་འབྲེལ་བ་ཡོད། འབྲུ་འཆི་བའི་སྐབས་སུ་མ་གཏོགས་རྩི་ཤིང་སྐྱེ་མི་ཐུབ། ཉམས་མྱོང་འཆི་བའི་སྐབས་སུ་མ་གཏོགས་རྟོགས་པ་སྐྱེ་མི་ཐུབ། འདི་ནི་བསྒྱུར་བའི་འགྲོ་རིམ་ངོ་མ་ཞིག་རེད།

མི་རྙོག་འཛིང་ཅན་ཞིག་གི་དྲན་པ་ཉམས་མྱོང་གིས་ཁེངས་ཡོད།

འདིས་ཁོང་གི་རྟོགས་པ་གསར་སྐྲུན་གྱི་ནུས་པ་མེད་པ་བསྟན་ཏེ། རྒྱུ་མཚན་ནི་ཉམས་མྱོང་ཡོངས་རྫོགས་སེམས་ཀྱི་རིམ་པ་ཚང་མའི་ནང་རྟོགས་རྗེས་ཉམས་མྱོང་གི་ཚུལ་དུ་མེད་པར་གྱུར་ཏེ་རྟོགས་པའི་ཚུལ་དུ་སྐྱེ་བའི་ཕྱིར།

ཐོག་མར་ཉམས་སུ་མྱོང་དགོས། འོན་ཀྱང་ང་ཚོ་ཉམས་མྱོང་གི་ས་ཁྱབ་ཀྱི་ནང་སྡོད་མི་རུང་སྟེ། དེ་འདྲ་ཡིན་ན་སེམས་རྙོག་འཛིང་ཅན་དང་དཀའ་ངལ་ཅན་དུ་འགྱུར། འཚོ་བ་དེ་ཤུགས་དྲག་གིས་བསྐྱལ་ཏེ་ཉམས་མྱོང་ཡོངས་རྫོགས་རྟོགས་པ་གསར་སྐྲུན་དུ་བསྒྱུར་དགོས།

གལ་ཏེ་ང་ཚོ་རྟོགས་པ་དང་ལྡན་པའི་སླ་མོ་དང་སྟབས་བདེ་ཞིག་བྱེད་འདོད་ན་འཇིག་རྟེན་དོར་དགོས་པ་དང་། སྤྲང་པོར་འགྱུར་དགོས། ཁང་ཆུང་དབེན་པའི་ནང་འཚོ་བ་བསྐྱལ་ཏེ་གོས་ལྭའི་ཚབ་ཏུ་སྣམ་བུ་གྱོན་དགོས་སྙམ་མཁན་དེ་དག་ནི་ནོར་འཁྲུལ་ཡོངས་སུ་གྱུར་བ་རེད།

དབེན་པའི་རི་ཁྲོད་པའི་ནང་མི་མང་པོ་ཞིག་དང་རི་ཁྲོད་ཁེར་རྐྱང་གི་ནང་འཚོ་བ་བསྐྱལ་མཁན་མང་པོ་དང་སྤྲང་པོ་མང་པོའི་སེམས་ནི་ཤིན་ཏུ་རྙོག་འཛིང་ཅན་ཞིག་ཡོད།

བསམ་བློའི་འཕེལ་འགྲིབ་རང་དབང་ཅན་ལ་ཆ་རྐྱེན་བཟོ་མཁན་གྱི་ཉམས་མྱོང་གིས་ཁེངས་ཡོད་པའི་དྲན་པ་ཡོད་ན་འཇིག་རྟེན་དང་ཁ་བྲལ་ཏེ་རི་ཁྲོད་པ་བྱེད་པ་ནི་དོན་མེད།

ཆ་འཕྲིན་དེ་དག་རྟོགས་པ་འོས་འཚམ་མེད་པ་དང་། སེམས་ཀྱི་ས་ཁྱབ་སྣ་ཚོགས་ཀྱི་ནང་རྣམ་ཤེས་ཀྱི་ནང་མ་གྱུར་བའི་དྲན་པས་ཁེངས་ན་དམ་པ་ཚོའི་འཚོ་བ་སྐྱེལ་འདོད་པའི་རི་ཁྲོད་པ་བྱེད་པ་ནི་དོན་མེད།

བློ་རིག་གི་ཆ་འཕྲིན་རྟོགས་པ་གསར་སྐྲུན་གྱི་ནང་བསྒྱུར་མཁན་ཚོས། འཚོ་བའི་ཉམས་མྱོང་རྟོགས་པ་གཏིང་ཟབ་ཀྱི་ནང་བསྒྱུར་མཁན་ཚོས་དྲན་པའི་ནང་གང་ཡང་མེད། ཁོང་ཚོ་སྐབས་དེར་སྐབས་དེར་བདེ་སྐྱིད་ངོ་མས་ཁེངས་ཤིང་སྟབས་བདེ་དང་སླ་མོར་གྱུར་ཡོད། ཁོང་ཚོ་བཟོ་བཀོད་ཕུན་སུམ་ཚོགས་པའི་ནང་སྡོད་པ་དང་གྲོང་ཁྱེར་གྱི་འཚོ་བའི་མཐའ་སྐོར་གྱི་ནང་སྡོད་ཀྱང་འདྲ།

བྱིས་པ་ཆུང་ཆུང་ཚོས་ལོ་བདུན་མ་ཟིན་བར་སེམས་སྟབས་བདེ་དང་ནང་སེམས་ཀྱི་མཛེས་སྡུག་ངོ་མས་ཁེངས་ཡོད་དེ། རྒྱུ་མཚན་ནི་ཁོང་ཚོའི་བརྒྱུད་དེ་འཚོ་བའི་སྙིང་བོ་འཚོ་བ་ཁོ་ན་དེ་བསྟན་ཞིང་སེམས་ཁམས་ཀྱི་རང་ཉིད་ཡོངས་སུ་མེད་པར་འགྱུར་བའི་ཕྱིར།

གལ་ཏེ་ང་ཚོ་དགའ་བདེའི་ངང་འཚོ་འདོད་ན་ང་ཚོས་བརླགས་ཟིན་པའི་བྱིས་དུས་དེ་རང་གི་སེམས་དང་བློ་ངོར་བསྐྱར་ལེན་བྱེད་དགོས། ང་ཚོས་ཉེས་མེད་ཀྱི་རང་བཞིན་དེ་བསྐྱར་ལེན་བྱེད་དགོས།

ཉམས་མྱོང་དང་སློབ་སྦྱོང་དེ་དག་རྟོགས་པ་གཏིང་ཟབ་ཀྱི་ནང་བསྒྱུར་རྗེས་དྲན་པའི་དུར་སའི་ནང་ལྷག་རོ་མེད་པར་གྱུར་ཏེ་སྐབས་དེར་ང་ཚོ་སྟབས་བདེ་དང་། སླ་མོ། ཉེས་མེད་ཀྱི་རང་བཞིན། དགའ་བདེ་བཅས་དང་ལྡན་པར་འགྱུར།

ཉམས་མྱོང་དང་ཤེས་བྱ་བླངས་པའི་ཐོག་བསམ་གཞིག་གཏིང་ཟབ་བྱས་ཏེ་རང་སྐྱོན་བརྟག་དཔྱད་གཏིང་ཟབ་བྱེད་པས་སེམས་ཁམས་དབྱེ་ཞིབ་ཀྱིས་ཡོངས་རྫོགས་རྟོགས་པ་གསར་སྐྲུན་གྱི་ནང་བསྒྱུར། འདི་ནི་ཤེས་རབ་དང་བྱམས་པ་ལས་སྐྱེས་པའི་དགའ་བདེ་ངོ་མའི་ལམ་རེད།