Jenérosidade

É misté amar y ser amadu, mas pa disgraça di mundu, ninhén ka ta ama nin é amadu.

Kel ku ta txoma amor é un kuza diskonxedu pa algen y ta konfundi-l fásilmenti ku paixón y ku medu.

Si algen podi amar y ser amadu, gueras ta ser konpletamenti inpusível na mundu.

Tantu kazamentus ki podi ser verdaderamenti filís, dizgrasadamente ka ta ser pamodi máguas vélhus akomuladu na memória.

Si konjúgis tína jenerozidadi, es ta skeseba pasadu dolorosu y es ta bibeba na plenu, txinu di verdaderu felisidadi.

Menti ta mata amor, ta distrui-l. Speriênsias, máguas vélhus, zius antigu, tudu es akomuladu na memória, ta distrui amor.

Tantu mudjêr risentidu ta podiba ser filís si es tína jenerozidadi sufisienti pa skese pasadu y pa bivi na prezenti adorandu mariu.

Tantu maridu ta podiba ser verdaderamenti filís ku ses mudjêr si es tína jenerozidadi sufisienti pa pirdua erus vélhus y pa manda pa skesimentu birras y maguas akomuladu na memória.

É misté, é urjenti ki kazamentus kumpriende signifikadu profundu di mumentu.

Maridus y mudjêrs debe sinti senpri sima risén-kazadu, skesendu kel ki pasa y bibendu alegrementi na prezenti.

Amor y risentimentus é substánsias átomikus inkonpatível. Na amor ka pode izisti risentimentus di ninhun spésie. Amor é pirdón eternu.

Izisti amor na kes ki ta sinti angústia verdaderu pa sufrimentus di ses amigus y inimigus. Izisti amor verdaderu na kel ki di tudu korasón ta trabadja pa ben-star di umildis, di pobris, di bisitadu.

Izisti amor na kel ki di manera spontáneu y natural ta sinti simpatia pa kunpône ki ta rega sulku ku ses suor, pa aldeanu ki ta sufri, pa mandjador ki ta pidi un moeda y pa kán ki ta sufri y duenti ki ta more di fomi na ladu di stráda.

Kandu di tudu korasón nu djuda algen, kandu na forma natural y spontánea nu ta kura árvore y rega flôr di djardin sen ki ninhén manda-nu, ten oténtika jenerozidadi, verdaderu simpatia, verdaderu amor.

Dizgrasadamente pa mundu, algen ka ten verdaderu jenerozidadi. Algen ta priokupa só ku ses própi konkistas egoístas, anseius, susesus, kunhisimentus, speriênsias, sofrimentus, prazeris, y nton nton.

Na mundu izisti txeu pesoas, ki ten só falsa jenerozidadi. Izisti falsa jenerozidadi na pulítiku astutu, na raposa ileitorál ki ta distuidja dinheru ku prupostu egoísta di kunsigui podér, prestíjiu, pozisón, rikézas, y nton nton. Nu ka debe konfundi gátu ku liébri.

Verdaderu jenerozidadi é absolutamenti disinteresadu, mas fásilmenti pode ser konfundidu ku falsa jenerozidadi egoísta di raposas di pulítika, di pilantras kapitalistas, di sátirus ki ta kodisi un mudjêr, y nton nton.

Nu debe ser jenerozu di korasón. Jenerozidadi verdaderu ka di Menti, jenerozidadi oténtiku é perfumi di korasón.

Si algen tína jenerozidadi, es ta skeseba tudu risentimentus akomuladu na memória, tudu speriênsias dolorozu di txeu ônti y ta prende pa bivi di mumentu a mumentu, senpri filís, senpri jenerozu, txinu di verdaderu sinseridadi.

Dizgrasadamente MI é memória y ta bivi na pasadu, ta kre senpri volta pa pasadu. Pasadu ta kaba ku algen, ta distrui felisidadi, ta mata amor.

Menti trankadu na pasadu nunka ka pode kumpriende na forma íntegra signifikadu profundu di mumentu ki nu sta bivi.

É txeu algen ki ta skrebi-nu ta buska konsolu, ta pidi un bálsamu presiozu pa kura ses korasón durosu, más é poku kes ki ta priokupa pa konsola aflitu.

É txeu pesoas ki ta skrebi-nu pa konta-nu stadu miserável ki es ta bivi, mas é raru kes ki ta partí uniku pón ki es ten pa alimenta pa partilha-l ku otus ki ta miziña.

Algen ka kre intende ma trás di tudu efeitu izisti un kauza y ma só mudandu kauza nu ta mudifika efeitu.

MI, nos keridu MI, é inerjia ki dja bivi na nos antesesoris y ki dja orijinal sertu kauzas pasadu ku ses efeitus prezenti ta kondisona nos izisténsia.

Nu meste JENEROZIDADI pa mudifika kauzas y tranforma efeitus. Nu meste jenerozidadi pa diriji ku sabidoria baruku di nos izisténsia.

Nu meste jenerozidadi pa tranforma radikalmenti nos própi vida.

Jenerozidadi lejítimu efetivu ka di menti. Oténtiku simpatia y verdaderu afetu sinséru, nunka ka pode ser rezultadu di medu.

É misté kumpriende ma medu ta distrui simpatia, ta kaba ku jenerozidadi di korasón y ta anikila na nos perfumi delisiozu di AMOR.

Medu é raí di tudu korupsón, orijen sigrédu di tudu guera, binenu mortál ki ta djenera y mata.

Mestris y mestras di skólas, koléjius y universidadis debe kumpriende mizesidadi di inkaminha ses alunus y alunas pa stráda di jenerozidadi verdaderu, valor, y sinseridadi di korasón.

Algen kabadu y torpi di jerason ki pasa, envés di kumpriende kuzé ki kel binenu di medu, es kultiva-l sima flôr fatál di stufa. Rizultadu di kel prósimu éra korupsón, kaósi y anarkia.

Mestris y mestras debe kumpriende óra ki nu sta bivi, stadu krítiku ki nu sta atxa-nu y mizesidadi di levanta jerasons nóvu riba di basês di un étika revolusionáriu ki sta na ton ku éra átomiku ki na es instantis di ángustia y di dor sta inisiadu entri truonadu awgustu di pensamentu.

EDUAKSON FUNDAMENTÁL ta baza na un sikolojia revolusionáriu y na un étika revolusionáriu, akordadus ku ritmu vibratóriu nóvu di éra nóvu.

Sentidu di kuoperason ta ten ki disloká totalmenti orrível bataia di kunpeténsia egoísta. Ta bira inpusível pa sabé kuopera kandu nu ta isklui prinsípiu di jenerozidadi efetivu y revolusionáriu.

É urjenti kumpriende na forma íntegra, ka só na nível intelektuál, mas tanbê na diskonxedu ku inkonsienti di menti inkonsienti y subkonsienti kuzé ki falta di jenerozidadi y orror di egoízmu. Só fazendu konsiénsia di kuzé ki é na nos egoízmu y falta di jenerozidadi ta sai na nos korasón fragânsia delisiozu di VERDADERU AMOR y di EFETIVA JENEROZIDADI ki ka di menti.