La Personalidadi Humana

Un ómi nasi, vive sesenta i sinku anu i móre. Má undi el staba antis di 1900 i undi ki el ta pode sta dipôs di 1965? Siénsia ofisial ka sabe nada sobri tudu es. Es é formulason jeral di tudu keston sobri vida i mórti.

Aksiomatikamenti nu pode afirma: “ÓMI MÓRE PUI KI SE TÉMPU TA KABA, KA TEN NENUN MANHÃ PA PERSONALIDADI DI KEL KI MÓRE”.

Kada dia é un onda di témpu, kada mês é otu onda di témpu, kada anu é tanbê otu onda di témpu i tudu es onda ligadu na se konjuntu ta konstitui GRANDE ONDA DI VIDA.

Témpu é redondu i vida di PERSONALIDADI UMANU é un kurva fexadu.

Vida di PERSONALIDADI UMANU ta dizenvolve na se témpu, ta nasi na se témpu i ta móre na se témpu, nunka el pode izisti más alén di se témpu.

Es di témpu é un prubléma ki dja ser studadu pa txeu sabedor. Fóra di dúvida témpu é KUARTA DIMENSON.

Jeometria di EUCLIDES é aplikável só na mundu TRIDIMENSIONAL má mundu ten séti dimenson i KUARTA é TÉMPU.

Menti umanu ta konsébe ETERNIDADI komu prolongason di témpu na linha reta, nada ka pode sta más enganadu ki es konseitu pamodi ETERNIDADI é QUINTA DIMENSON.

Kada mumentu di izisténsia ta susede na témpu i ta repeti eternamenti.

Mórti i VIDA é dôs strému ki ta toka. Un vida ta kaba pa ómi ki ta móre má ta kumesa otu. Un témpu ta kaba i otu ta kumesa, mórti sta íntimamente ligadu ku ETERNU TORNO.

Es kre di ki nu ten ki torna, volta pa es mundu dipôs di mórtu pa repiti mésmu drama di izisténsia, más si, PERSONALIDADI umanu ta perece ku mórti, ken ki ta torna ó ki kuza ki ta torna?

É nesesáriu isklarese di un bês pa sénpri ki AMI KI É KI TA kontinua dipôs di mórti, ki AMI KI É ken ki ta torna, ki AMI KI É ken ki ta volta pa es val di lágrima.

É nesesáriu ki nos leitor ka konfundi Lei di TORNO ku Teoria di REINKARNASON sinadu pa TEOSOFIA MODERNA.

Kel teoria di REINKARNASON tin se orijen na kultu di KRISHNA ki é un RELIJON INDOSTAN di tipu Védiku, dizgrasiadamenti retokadu i adulteradu pa riformadoris.

Na kultu auténtiku orijinal di Krishna, só EROIS, GIA, kes ki dja ten INDIVIDUALIDADI SAGRADU, é kes ki ta reinkarna.

AMI PLURALIZADU TA TORNA, ta volta má es ka é REINKARNASON. Masas, multitudis TA TORNA, má kel ka é REINKARNASON.

Ideia di TORNO di kuzas i fenoménus, ideia di repetison eternu ka é mutu antigu i nu pode atxa-l na SABEDORIA PITAGÓRIKU i na antigu kosmogonia di INDOSTAN.

Eternu torno di Dias i Noitis di BRAHAMA, repetison insesanti di KALPAS, etc., sta invariávelmenti asosiadu na forma mutu íntimu ku Sabedoria Pitagóriku i ku Lei di REKURÉNSIA eternu ó eternu TORNO.

Gautama kel BUDHA sinau mutu sabimenti DOUTRINA di ETERNU TORNO i roda di vidas susesivu, má se DOUTRINA foi mutu adulteradu pa se siguidoris.

Tudu TORNO ta inplika di sertu fabrikason di un nóvu PERSONALIDADI UMANU, es ta forma durente primeru séti anu di infánsia.

Anbienti di família, vida di rua i Skóla, ta da PERSONALIDADI UMANU, se tintu orijinal karakterístiku.

EZENPLU di más grandi é difinitivu pa personalidad infantil.

Mininu ta inpara más ku izenplu ki ku priséitu. Forma enganadu di vive, kel izenplu absurdu, kustumi deneradu di más grandi, ta da personalidade di mininu kel tintu pékuliar skétiku i perversu di époka ki nu sta vive.

Na es témpus modernu adultériu bira más kunun ki batata i cebola i komu é lójiku es ta orijina sena dantesku na interiór di laris.

É txeu mininus ki pa es témpus ten ki suporta txinu di dor i resentimentu, txikoti i pal di padrastu ó di madrasta. É klaru ki na kel forma PERSONALIDADI di mininu ta dizenvolve drentu di kuadru di dor, rancor i ódiu.

Ten un dizidu vulgar ki ta di: “Fiju di ken ki ka é di nu ta txera feiu na tudu parti”. Naturalmenti na es tanbê ten iseson má es pode konta ku dédus di mon i ta sobra dédus.

Alterkadu entri pai i mai pa keston di jelus, txoru i lamentus di mai aflitu ó di maridu oprimidu, arruinadu i dizisperadu, ta dexa na PERSONALIDADI di mininu un marka indelébel di prúfundu dor i melankolia ki nunka ta skese durente tudu vida.

Na kaza elaganti sinhora orgulhozu ta maltrata se kriadus oras ki es ta bai na salon di beleza ó es ta pinta kara. Orgulhu di sinhora ta sinti mortalmenti feridu.

Mininu ki ta odja tudu es sena di infámia ta sinti mágoa na más prúfundu, ja sea ki el ta poi di parti di se mai soberbu i orgulhozu, ó di parti di kel infelis kriadu vanidozu i unmiadu i rizultadu ta kustuma ser katastrófiku pa PERSONALIDADI INFANTIL.

Desdi ki invénta tilivizon dja perde unidadi di família. Na otus témpus ómi ta txiga di rua i era risébidu pa se mudjer ku mutu alegria. Oji ki dia ja mudjer ka ta sai pa risébe se maridu na porta pamodi el sta okupadu ta odja tilivizon.

Drentu di laris modernu pai, mai, fiju, fija, ta parse autómatu inkonsienti antis di pantaja di tilivizon.

Agora maridu ka pode kumenta ku mudjer abisolutamenti nada ku prublémas di dia, trabadju, etc., etc. pamodi es ta parse sonánbulu ta odja filmi di onti, sena dantesku di Al Capone, últimu dansa di nóvu onda, etc. etc. etc.

Mininus levantadu na es nóvu tipu di lar ultramodernu ta pensa só na kanhon, pistola, metralhadora di brinka pa imita i vive a se modu tudu sena dantesku di krimi tal komu es dja odja na pantaja di tilivizon.

É pena ki kel inventu maravilhozu di tilivizon ta ser utilizadu ku prupozitus distrutivu. Si umanidadi utilizaba es inventu na forma dignifikanti ja pa studa siénsias naturais, ja pa sina verdadeiru arti réjiu di MÃE NATURA, ja pa da ensinanzi sublími na jentis, anton es inventu ta serba un benson pa umanidadi, ta pode ser utilizadu intelijentimenti pa kultiva personalidad umanu.

É pa tudu lus absurdu nutri PERSONALIDADI INFANTIL ku múzika arrítmiku, inarmóniku, vulgar. É istúpidu nutri PERSONALIDADI di mininus, ku kontus di ladron i pulísia, sena di vísiu i prustituson, dramas di adultériu, pornografia, etc.

Rizultadu di senelhanti prusede nu pode odja-l na Ribeldi sen Kauza, asasinus primaturu, etc.

É lamenti ki mais ta txikotia se mininus, ta da-s pal, ta insulta-s ku boka dizkonpostu i kruel. Rizultadu di senelhanti konduta é resentimentu, ódiu, perda di amor, etc.

Na prátika nu pode odja ki mininus levantadu entri pal, txikoti i gritus, ta bira person ki vulgar txinu di pataneria i falta di tudu sentidu di rispetu i vinerason.

É urjenti kunprinde nesesidadi di stabelese un verdadeiru ekilíbriu drentu di laris.

É indispinsável sabe ki dulzura i siveridadi debe ekilibra mutuamenti na dôs pratu di balansa di justisa.

PAI ta rizpresenta SIVERIDADI, MAI ta rizpresenta DULZURA. Pai ta pirsonifika SABEDORIA. MAI ta sinboliza AMOR.

SABEDORIA i AMOR, SIVERIDADI i DULZURA ta ekilibra mutuamenti na dôs pratu di balansa kózmiku.

Pais i Mais di família debe ekilibra mutuamenti pa ben di laris.

É urjenti, é nesesáriu, ki tudu Pais i Mais di família kunprinde nesesidadi di sinbra na menti infantil VALORIS ETERNU di ESPÍRITU.

É lamenti ki mininus modernu ja ka ten sentidu di VINERASON, es ta debe na kontus di vakeru ladron i pulísia, tilivizon, sinema, etc. dja pirverti menti di mininus.

PSIKOLOJIA RIULUSIONÁRIU di MOVIMENTU GNÓSTIKU, na forma klaru i prisizu ta faze un distinson di fundu entri EGO i ISÉNSIA.

Durente três ó kuatu primeru anu di vida, ta manifesta só na mininu beleza di ISÉNSIA, anton mininu é téneru, dulse, bunito na tudu se aspetus Psikolójikus.

Oras ki EGO ta kumesa kontrola téneru personalidad di mininu tudu kel beleza di ISÉNSIA ta bai dizaparise i na se lugar ta aflora anton difeitus Psikolójikus propiu di tudu ser umanu.

Sima nu debe faze distinson entri EGO i ISÉNSIA, tanbê é nesesáriu distingui entri PERSONALIDADI i ISÉNSIA.

Ser umanu ta nasi ku ISÉNSIA má ka ta nasi ku PERSONALIDADI, es úrtimu é nesesáriu kria-l.

PERSONALIDADI i ISÉNSIA debe dizenvolve na forma armoniózu i ekilibradu.

Na prátika nu pode verifika ki oras ki PERSONALIDADI ta dizenvolve izajeradamenti a spénsas di ISÉNSIA, rizultadu é BRINKON.

Obzirvason i spiriénsia di txeu anu dja permiti-nu kunprinde ki oras ki ISÉNSIA ta dizenvolve totalmenti sen atende na más minímu kultivu armoniózu di PERSONALIDADI, rizultadu é místiku sen intelektu, sen personalidad, nóbli di korason má inadaptadu, inkapás.

Dizenvolvimentu ARMONIOSU di PERSONALIDADI i ISÉNSIA ta da pa rizultadu ómis i mudjeris jenial.

Na ISÉNSIA nu ten tudu kel ki é propiu, na PERSONALIDADI tudu kel ki é pristadu.

Na ISÉNSIA nu ten nos kualidadis inatu, na PERSONALIDADI nu ten izenplu di nos más grandi, kel ki nu inpara na Lar, na Skóla, na Rua.

É urjenti ki mininus ta risébe alimentu pa ISÉNSIA i alimentu pa PERSONALIDADI.

ISÉNSIA ta alimenta ku tinura, karinhu sen límitis amor, múzika, flór, beleza, armonia, etc.

PERSONALIDADI debe alimenta ku bon izenplu di nos más grandi, ku sabiu ensinanza di skóla, etc.

É indispinsável ki mininus ta ingresa na primárias na idadi di séti anu préviu pasu pa kinder.

Mininus debe inpara primeru lítras ta brinka, asina studu ta bira pa es, atrativu, delisiosu, filís.

IDUKASON FUNDAMENTAL ta sina ki desdi mésmu KINDER ó jardin pa mininus, debe atende na forma spesial kada un di três aspetus di PERSONALIDADI UMANA, konxedu komu pensamentu, moviméntu i ason, asina personalidad di mininu ta dizenvolve na forma armoniózu i ekilibradu.

Keston di kriason di PERSONALIDADI di mininu i se dizenvolvimentu, é di gravísimu riisponsabilidad pa PAIS DI FAMÍLIA i MESTRI DI SKÓLA.

Kualidadi di PERSONALIDADI UMANA ta dipende iskluzivamenti di tipu di material Psikolójiku ku kel ki foi kriadu i alimentadu.

Na volta di PERSONALIDADI, ISÉNSIA, EGO ó AMI, ta izisti entri studantis di PSIKOLOJIA mutu kunfuson.

Algun ta kunfundi PERSONALIDADI ku ISÉNSIA i otus ta kunfundi EGO ó AMI ku ISÉNSIA.

É txeu Skólas Séudu-Ezotériku ó Séudu-Okultista ki ten komu méta di se studus VIDA IMPERSONAL.

É nesesáriu isklarese ki ka é PERSONALIDADI kel ki nu ten ki dizolve.

É urjenti sabe ki nu prisiza dizintegra EGO, Mi MÉSmu, AMI riduzi-l na polvareda kózmiku.

PERSONALIDADI é tan sô un veíkulu di ason, un veíkulu ki foi nesesáriu kria, fabrika.

Na mundu ta izisti KALÍGULAS, ÁTILAS, HITLERIS, etc. Tudu tipu di personalidad pur perversu ki el ja ser, pode trasforma radikalmenti oras ki EGO ó AMI ta dizolve totalmenti.

Es di Dizoluson di EGO ó AMI ta kunfundi i mola txeu Séudu-Ezoterista. Es sta kunvinsidu di ki EGO é DIVINU, es ta krê ki EGO ó AMI é mésmu SER, MONADI DIVINA, etc.

É nesesáriu, é urjenti, é inaplazável kunprinde ki EGO ó AMI nada ka ten di DIVINU.

EGO ó AMI é kel SATÁN di BÍBLIA, manódju di lembra, dizéju, paxons, ódius, resentimentus, konkupisénsias, adultérius, eránsa di família, rasas, nason, etc., etc., etc.

Txeu ta afirma na forma istúpidu ki na nos ta izisti un AMI SUPERIOR ó DIVINU i UN AMI INFERIOR.

SUPERIOR i INFERIOR é sénpri dôs seson di un mésmu kuza. AMI SUPERIOR, AMI INFERIOR, é dôs seson di mésmu EGO.

SER DIVINAL, MONADI, ÍNTIMU, nada ka ten ki ver ku nenun forma di AMI. SER é SER i kel é tudu. Razon di SER é mésmu SER.

PERSONALIDADI na si mésmu é sô un veíkulu i nada más. A traves di personalidad pode manifesta EGO ó SER, tudu ta dipende di nos mésmu.

É URJENTI dizolve AMI, EGO, pa ki ta manifesta sô a traves di nos PERSONALIDADI, ISÉNSIA PSIKOLÓJIKU di nos VERDADEIRU SER.

É indispinsável ki IDUKADORIS ta kunprinde plenamenti nesesidadi di kultiva armoniosamenti três aspetus di PERSONALIDADI UMANA.

Un perfetu ekilíbriu entri personalidad i ISÉNSIA, un dizenvolvimentu armoniosu di PENSAMENTU, EMOSON i MOVIMÉNTU, un ÉTIKA RIULUSIONÁRIU, ta konstitui basamentus di IDUKASON FUNDAMENTAL.