Verdadi

Dêsdi infância y juventudi ta kumesa Via-Crucis di nos esistência miserável ku txeu torturas mental, tragédias di família íntimas, kontratempus na kaza y na skola etc.

É klaru ma na infância y juventudi, a não ser raras exseções, tudu es problemas li ka ta afeta-nu di forma rialmenti prufundu, mas kantu nu ta bira algen más grandi, ta kumesa kes pergunta: Kenha ki N é? Di undi ki N ben? Pamodi ki N ten ki sufri? Kual ki objetu di es esistência? etc. etc. etc.

Tudu algen na kaminhu di vida ja faze es perguntas, tudu algen un bês kre investiga, inqueri, konxe “pamodi” di txeu amargura, desilusões, lutas y sofrimentus, mas infelizmente nu ta akaba senpri engarrafadu na algun teoria, na algun opinião, na algun krênsa na kel ki vizinhu fla, na kel ki algun viju dekreptu responde-nu, etc.

Nu perde inosência verdaderu y pas di korason trankilu y pamodi kel-li nu ka ten kapasidadi di esperimenta diretamente verdade na tudu se krueza, nu ta dipendi di kel ki otus ta fla y é klaru ma nu sta na kaminhu eradu.

Sôsiedadi kapitalista ta kondena radikalmenti ateus, kes ki ka ta kre na Deus.

Sôsiedadi Marxista-Leninista ta kondena kes ki SIM ta kre na DEUS, mas na fundu tudu kes kuza la é mésmu kuza, questão di opiniões, kaprixus di algen, projeções di menti. NEM kredulidadi, nem inkredulidadi, nem setisismu, ka ta signifika ma nu ja esperimenta verdade.

Menti pode da luxu di kre, dúvida, opina, faze konjeturas, etc, mas kel-li ka ta esperimenta verdade.

Tanbê nu pode da luxu di kre na sol ô di ka kre na el y até di dúvida di el, mas astru rei ta sigui ta da lus y vida pa tudu kel ki izisti sen ki nos opiniões ten pa el mínimu inportância.

Tras di krênsa siegu, tras di inkredulidadi y di setisismu, ta sconde txeu matizes di falsa moral y txeu konceitus inkoretu di falsa respetabilidad ki na se sonbra ta fortifika MI.

Sôsiedadi di tipu kapitalista y sôsiedadi di tipu komunista ten kada un a se modu y di akordu ku se kaprixus, prejulgamentus y teorias, se tipu spesial di moral. Kel ki é moral drentu di bloku kapitalista é imoral drentu di bloku komunista y vise-versa.

Moral ta dipendi di kustumis, di lugar, di époka. Kel ki na un país é moral na otu país é imoral y kel ki na un époka foi moral, na otu époka é imoral. Moral ka ten valor isensial algun, analizandu el a fundu, ta rezulta stúpidu na un sentu pur sentu.

Edukaçon fundamental ka ta inxina moral, edukason fundamental ta inxina ÉTIKA REVOLUCIONÁRIA y kel-li ki novas jerações meste.

Dêsdi noti aterrador di sékulus, na tudu ténpus, senpri tevi ómis ki afasta di mundu pa buska VERDADE.

É absurdu afasta di mundu pa buska VERDADE pamodi el sta drentu di mundu y drentu di ómi aki y gósi.

VERDADE é kel dizkonxedu di mumentu en mumentu y ka é apartandu di mundu nem abandonandu nos similhanti ki nu pode diskubri-el.

É absurdu fla ma tudu verdade é verdade a miais y ma tudu verdade é mei erru.

VERDADE é radikal y É ô ka É, nunka el pode ser a miais, nunka el pode ser mei erru.

É absurdu fla: VERDADE é di ténpu y kel ki na un ténpu foi na otu ténpu ka é.

VERDADE nada ka ten a ver ku ténpu. VERDADE é ATEMPORAL. MI é ténpu y pamodi kel-li ka pode konxe VERDADE.

É absurdu supu verdadis konvensional, temporal, relativu. Algen ta konfundi konceitus y opiniões ku kel ki é VERDADE.

VERDADE nada ka ten a ver ku opiniões nem ku kes ki txoma verdadis konvensional, pamodi kes-li é unkamenti projeções intrasendenti di menti.

VERDADE é kel dizkonxedu di mumentu en mumentu y so pode ser esperimentadu na ausência di MI psikolójiku.

Verdade ka é questão di sofismas, konceitus, opiniões. Verdade so pode ser konxedu através di speriência direta.

Menti so pode opina y opiniões nada ka ten a ver ku verdade.

Menti nunka ka pode koncebe VERDADE.

Mestres, mestras di skolas, koléjius, universidadis, debe esperimenta verdade y sinála kaminhu pa se disípulus y disípulas.

VERDADE é questão di speriência direta, ka é questão di teorias, opiniões ô konceitus.

Nu pode y nu debe studa mas é urjenti esperimenta pur si mésmu y na forma direta kel ki tevi di verdade na kada teoria, konceitu, opinião, etc. etc. etc.

Nu debe studa, analiza, inkeri, mas tanbê nu meste ku URJÊNSIA inadiável esperimenta VERDADE kontinidu na tudu kel ki nu ta studa.

É inposível esperimenta VERDADE enkuantu ki menti sta ajitadu, konvulsionadu, atormentadu pur opiniões kontrapôstu.

So é posível esperimenta VERDADE kantu menti sta kietu, kantu menti sta na silênsiu.

Mestres y mestras di skolas, koléjius y universidadis, debe indika pa alunus y alunas kaminhu di meditaçon interior prufundu.

Kaminhu di meditaçon interior prufundu ta konduzi-nu até kietudi y silênsiu di menti.

Kantu menti sta kietu, vázio di pensamentus, desejus, opiniões, etc., kantu menti sta na silênsiu ta ben pa nos verdade.