Kes Três Sirbêl

Sicologia rivulucionáriu di era nóvu ta afirma ma mákina orgániku di ANIMAL INTELECTUAL ki é txomadu falsamenti ómi, ta existi na forma triséntrika ô triserebradu.

Primeru sirébru sta trankadu na káxa kranianu. Sigundu sirébru ta korrespondi konkretamenti ku spinha dorsal ku se médula sentral i tudu se ramus nervozu. Térseru sirébru ka ta rezidi na lugar definidu tanpoku é un órgun determinadu. Na verdadi térseru sirébru sta konstituídu pa plexus nervozu simpátiku i en jeral pa tudu sentrus nervozu spesífiku di organizmu umanu.

Primeru sirébru é sentru ki ta pensa. Sigundu sirébru é sentru di movimientu, kumumenti txomadu sentru motor. Térseru sirébru é sentru emosional.

Sta konpletamenti dimonstradu na prátika ma tudu abuzu di sirébru ki ta pensa ta produzi gastu isesivu di inerjia inteletual. É lójiku afirma sen medu a dúvida ma manikómius é verdaderu simitérius di mortus inteletual.

Disportus armoniozu i ekilibradu é úteis pa sirébru motor, ma abuzu di disportu signifika gastu isesivu di inerjias motris i rizultadu ta xinti ser dizastrozu. Ka é absurdu afirma ma ten mortus di sirébru motor. Kes mortus li é konxedu komu duentis di Hemiplejia, Paraplejia, Parális progresiva, etc.

Sentidu stétiku, a mística, êxtasi, múzika superior, é nisisáriu pa kultiva sentru emosional, ma abuzu di kel sirébru li ta produzi dizgasti inúti i dizbardju di inerjias emosional. Es ta abuza di sirébru emosional esistensialistas di “onda nóvu”, fanátikus di Rock, Seudu-Artistas sensuais di arti modernu, pasionárius mórbidus di sensualidadi, etc., etc.

Apesar di ki ta parse inkredibli, mortis sertamenti ta prozesa pa térsus na kada pessoa. Dja sta kunprovadu ti fartura ma tudu duénsa ten se bazi na kualker di três sirébrus.

Lei grandi dja dipozita sabimenti na kada un di três sirébrus di animal inteletual, determinadu kapital di VALÓRES VITAL. Ekonumiza kel kapital li signifika na fetu alarga vida, malgasta kel kapital li ta produzi mortis.

Tradisons arkaikus ki txiga ti nós désdi noti terorizanti di sékulus, ta afirma ma média di vida umanu na Kontinenti antigu MU, situadu na Oseanu Pasífiku, ta osilaba entri Dózi i Kínzi Sékulus.

Ku pasa di sékulus através di tudu idadis uzu inkurretu di três sirébrus foi kurta vida poku a poku.

Na país ensolaradu di KEM… lá na Ijitu antigu di Faraós média di vida umanu ta alkansaba dja unikamenti a sêntu i kuarenta anus.

Atualmenti na kes ténpus modernu di benziná i seluloide, na é puka di esistensializmu i ribeldis di Rock, média di vida umanu sigundu algun konpanhias di Siguru é apénas di sinkuenta anus.

Sinhoris Marxista-Leninistas di UNION SOVIÉTICA, fanfarronis i mintirozus simpri, ta anda di li ta fla ma es inventa suérus mui spésial pa alarga vida ma mininu Kruschev inda ka ten oitenta anus i ten ki pidi pormison a un pé pa labanta otu.

Na sentru di ÁSIA ta existi un komunidadi rilijioza konstituídu pa ansions ki dja ka ta lenbra ses juventudi. Média di vida di kes ansions ta osila entri kuatrós sêntus i kinhentus anus.

Tudu Sigredu di vida longu di kes Mónjis Aziátiku sta konsisti na uzu sabiu di três sirébrus.

Funsiunalizmu ekilibradu i armoniozu di três sirébrus signifika ekonumia di VALÓRES VITAL i komu lójika sikénsia, prolongason di vida.

Ta existi un Lei kózmiku konxedu komu “IGUALASON DI VIBRASONS DI MONTIS FONTIS”. Mónjis di kel Mustéru li sa uza kel lei li purmeiu di uzu di três sirébrus.

Pudagujia stemporaniu ta kondus alunos i alunas a abuzu di sirébru ki ta pensa ki se rizultadus dja konxe Sikiatria.

Kultivu intelijenti di três sirébrus é IDUKASON FUNDAMENTAL. Na skólas antigu di mistérius di Babilonia, Grécia, Índia, Pérsia, Ijitu, etc., alunos i alunas ta risibia informason íntegra direta, pa ses três sirébrus purmeiu di prisetu, dánsa, múzika, etc., intelijentimenti kunbinadu.

Teatrus di ténpus antigu ta formaba parti di skóla. Drama, kumédia, trajédia, kunbinadus ku mímika spésial, múzika, sinadura oral, etc.. Ta sirbiba pa informa três sirébrus di kada indívidu.

Nton studantis ka ta abuzaba di sirébru ki ta pensa i sa uza ku intelijénsia i na forma ekilibrada ses três sirébrus.

Dánsas di mistérius di Eleusis na Grécia, teatru na Babilonia, skultura na Grécia foi simpri utilizadus pa transmiti kunhisimentus a disíplus i disíplas.

Agora na kes ténpus dizinéradu di Rock, alunos i alunas kunfundidus i dizurientadus ta anda pa kaminhu tenebrozu di abuzu mental.

Atualmenti ka ta existi verdaderu sistéma kriador pa kultivu armoniozu di três sirébrus.

Mestris i mestras di skólas, koléjius i univirsidadis, so ta diriji a minória infiel di studantis atxati ki ta spera ku ansiedadi ora di sai di sala di aula.

É urjenti, é indispensável sa kunbina inteletu, movimientu i emuson ku prupozitu di leba informason íntegra a três sirébrus di studantis.

Ta xinti absurdu informa a un so sirébru. Primeru sirébru ka é uniku di kognison. Ta xinti kriminozu abuza di sirébru ki ta pensa di alunos i alunas.

IDUKASON FUNDAMENTAL debe kondus studantis pa kaminhu di dizenvolvimentu armoniozu.

Sikologia rivulucionáriu ta sinha klaramenti ma três sirébrus ten três klasis di asosiason independinti totalmenti distintu. Kes três klasis di asosiason ta invoka diferenti tipus di impulsus di ser.

Kel-li ta da-nu di fetu três pirsunalidadis diferenti ki ka ta pirsedi nada na kumun tanpoku na se natureza tanpoku na se manifestasons.

Sikologia rivulucionáriu di era nóvu ta sinha ma na kada pessoa ta existi três aspetus psikolójiku distintu. Ku un parti di isénsia psíkiku nu ta deseja un kuza, ku otu parti nu ta deseja algun kuza dizididamenti diferenti i grasa a térseru parti nu ta faze algun kuza totalmenti opostu.

Na un instanti di suprimu dor, talves perda di un ser karu ô kualker otu katástrofi íntima, pirsunalidadi emosional ta txiga ti dizisperason enkuantu pirsunalidadi inteletual ta-gunta pamodi di tudu kel trajédia li i pirsunalidadi di movimientu so ta kria fuji di sena.

Kes três pirsunalidadis distintu diferenti i montis bês ti kontraditórius debe ser intelijentimenti kultivadus i instruídus ku métodus i sistéma spésial na tudu skólas, koléjius i univirsidadis.

Di pontu di vista psikolójiku ta xinti absurdu iduka izklusivamenti a pirsunalidadi inteletual. Ómi ten três pirsunalidadis ki prisiza urjentimenti di IDUKASON FUNDAMENTAL.