Sabe Scuta

Na mundu ten txeu orador ki ta surpreende pa ses elokwensia, mas é poku algen ki sabe obi.

Sabe obi é mutu difísil, é poku algen ki ta sabe obi di verdade.

Kandu MESTRE ta pâpia, profesora, palestrante, auditóriu parece ta sta mutu atent, kuma ta sigui na detalhi kada palavra di orador, tudu ta da ideia ki es ta sta ta obi, ki es sta na stadu di alerta, mas na fundu psikolójiku di kada indívidu ten un sekretáriu ki ta traduzi kada palavra di orador.

ES SEKRETÁRIU É AMI, AMI MESMU, EL MESMU. Trabádju di kel sekretáriu li é pa interpreta mal, traduzi mal palavras di orador.

AMI ta traduzi di akordu ku ses prejulgamentus, prekonseitus, medus, orgulhu, ansiedadis, ideias, memória, etc., etc., etc.

Alunus na skóla, alunas, indívidus ki djuntu ta konstitui auditóriu ki ta obi, na verdade es ka sta ta obi orador, es sta ta obi es mésmu, es sta ta obi ses própiu EGU, ses karinhózu EGU MAKIAVÉLIKU, ki ka sta dispostu pa aseita kel ki é REAL, kel ki é VERDADERU, kel ki é ESENSIAL.

Só na stadu di alerta NOVIDADI, ku MENTE ESPONTÂNIA libri di pézu di pasadu, na stadu di plena RECEPTIVIDADI, ki nu pode obi di verdade sen intervenson di kel péssimu sekretáriu di mal auguriu txomadu AMI, AMI MESMU, EL MESMU, EGU.

Kandu menti sta kondisionadu pa memória, el ta repiti so kel ki el ten akumuladu.

Menti kondisionadu pa esperiénsias di txeu dia di ontin, el pode odja prezenti só através di lenti suju di pasadu.

SI NU KRÊ SABE OBI, si nu krê prende obi pa diskubri kel nóvu, nu debe vive di akordu ku filosofia di MOMENTANEIDADI.

É urjenti vive di momentu pa momentu sen preokupason di pasadu, i sen projetus di futuru.

VERDADI é kel diskonxedu di momentu pa momentu, nos mentis debe sta senpri alertas, na plena atenson, libris di prejulgamentus, prekonseitus, pa nu ser na verdade rezeptívus.

Mestris i profesoras di skóla debe sinâ es alunus i alunas signifikadu profundu ki sta na kel di sabe obi.

É nesesáriu prende vive ku sabedoria, reafirma nos sentidus, refina nos konduta, nos pensamentus, nos sentimentus.

Ka ta sirvi pa nada ten un grandi kultura akadémiku, si nu ka sabe obi, si nu ka ser kapaz di diskubri kel nóvu di momentu pa momentu.

Nu meste refina atenson, refina nos midjeria, refina nos pesoas, kuzas, etc., etc., etc.

É inposível ser verdadeiramente refinadu kandu nu ka sabe obi.

Mentis tuskus, brutus, deterioradus, dijeneradus nunka ka ta sabe obi, nunka ka ta sabe diskubri kel nóvu, kes mentis li so ta konprende, so ta intende na forma inkoreta traduson absurda di kel sekretáriu satániku txomadu AMI, AMI MESMU, EGU.

Ser refinadu é un kuza mutu difísil i el ta rikeri plena atenson. Algen pode ser un pessoa mutu refinadu na modas, trajis, vistidus, jardin, karus, amizadis, i mésmu asina kontinua na kel íntimu ta ser brutu, tusku, pezadu.

Ken ki sabe vive di momentu pa momentu, el ta marcha na verdade pa kunminhu di verdadeiru refinamentu.

Ken ki ten Menti rezeptivu, espontâniu, íntegru, alerta, el ta kaminha pa senda di auténtiku refinamentu.

Ken ki ta abri pa tudu kel nóvu abandunandu pézu di pasadu, prekonseitus, prejulgamentus, disconfiansas, fanatizmus, etc., el ta marcha triunfalmenti pa kunminhu di lejítimu refinamentu.

Menti dijeneradu ta vive imbotijadu na pasadu, na prekonseitus, orgulhu, amor própiu, prejulgamentus, etc., etc.

Menti dijeneradu ka ta sabe odja kel nóvu, ka ta sabe obi, el sta kondisionadu pa AMOR PRÓPIU.

Fanátikus di MARXISMO-LENINISMO ka ta aseita kel nóvu; es ka ta admiti kuarta KARACTERÍSTIKA di tudu kuzas, kuarta DIMENSON, pa amor própiu, es ta kre dimaes es mésmu, es ta apegadu pa ses própiu teorias materialistas absurdas i Kandu nu ta situas na terrenu di faktus konkretus, kandu nu ta dimonstras absurdu di ses sofismas, es ta ntanta braçu izkerdu, es ta odja ponteirus di ses órdi di pulsu, es ta da un diskulpa evasiva i es ta bai.

Kes li é mentis dijeneradus, mentis dekrepitus ki ka ta sabe obi, ki ka ta sabe diskubri kel nóvu, ki ka ta aseita realidadi pamodi es sta imbotijadus na AMOR PRÓPIU. Mentis ki ta kre dimaes asi mésmu, mentis ki ka sabe di REFINAMENTUS KULTURAIS, mentis tuskus, mentis brutus, ki ta obi so ses karinhózu EGU.

IDUKASON FUNDAMENTAL ta sina obi, ta sina vive ku sabedoria.

Mestris i profesoras di skólas, koléjius, universidadis debe sinâ es alunus i alunas kunminhu auténtiku di verdadeiru refinamentu vital.

Ka ta sirvi pa nada permanese dés i kinzi anus metedu na skólas, koléjius i universidadis, si óra ki nu sai nu ser internamenti verdaderus porkus na nos pensamentus, ideias, sentimendus i kustumis.

Nu meste IDUKASON FUNDAMENTAL na forma urjenti pamodi novas jerasons ta signifiká komésu di un nóvu era.

Txiga óra di REVOLUSON VERDADERU, txiga instantis di REVOLUSON FUNDAMENTAL.

Pasadu é pasadu i dja da ses frutus. Nu meste konpreende signifikadu fundu di momentu ki nu sta ta vive.