A Vida

Més ki parse inkredibl, é mui sértu i di tuda verdadi, ma es sivilizason mudérnu ki ta papia txeu del é spantozamenti feiu, el ka ta djunta karaktéristika di importanti di sintidu stétiku, el é pribadu di beleza interior.

É txeu kel ki nu ta prezumi ku kel kazas fedju la ki ta da medu, ki ta parse verdaderu ratueira.

Mundu bira terivelmenti xatu, mésmu ruas di sémpre i kazas ki ta da medu na tudu lugar.

Tudu es bira kansativu, na Norti i na Sul, na Lesti i na Oesti di Mundu.

É mésmu uniformi di sémpre: ki ta da medu, ki ta da vúmitu, stériu. “Mudernismu!”, kel ki multidon ta grita.

Nu ta parse verdaderu pavon vanidozu ku ropa ki nu ta trazi i ku sapatos mui brilhozu, méski pa li, pa lá i pa akilá ta anda milhons di infelizis ki ten fome, malnutridu, miseravel.

Simplesa i beleza natural, spontâneu, injénuu, sen artifísius i pinturas vanidozu, dja disparsi na Sexu Femininu. Gósi nu é mudérnu, asi ki vida é.

Pessoas bira spantozamenti kruel: karidadi dja panha friu, ninhun ka ta tene dó di ninhun.

Vitrinas ô aparadoris di armazens luxu ta brilha ku merkadoria luxu ki definitivamenti sta fora di alkansi di infelizis.

Úniku kuza ki Párias di vida pode faze é kontempla sedas i joias, perfumis di fraskus luxu i guarda-xuba pa aguacerus; odja sen pode mexe, sufrimentu ki parse kel di Tântalu.

Pessoas di es ténpus mudérnu bira dimás groséru: perfumi di amizadi i fragransia di sinceridadi dja disparsi radikalmenti.

Multidon ta djemi sobrekarregadu di impostus; tudu mundu sta na prublémas, es debe-nu i nu debe; es ta julga-nu i nu ka ten ku ki paga, preokupasons ta straga sérbrus, ninhun ka ta vive trankilu.

Burókratas ku kurva di felisidadi na ses brenti i un bon sigaru na boca, na kel ki psikolojikamenti es ta apoia, ta djuga malabarismu polítiku ku menti sen importa-s pa dor di povus.

Ninhun ka ta feli pa es ténpus li i menus klas média, es ta atxa es na meiu di spada i muralha.

Rikus i pobres, kreintis i diskreintis, kumersiantis i mendigus, sapateirus i latoneirus, ta vive pamodi es ten ki vive, es ta sufoka na vinhu ses torturas i até es ta bira drogaditus pa skapá di ses mésmus.

Pessoas bira malisiozu, resioso, diskonfiadu, astutu, perversu; ninhun ka ta kri más na ninhun; es ta inventa diaramenti novu kondisons, sertifikadus, kurtapisas di tudu jenéru, dukumentus, kredensiais, etc., i di tudu manera nada di kel ka ta sirvi más, espertus ta ri di tudu es tonterias: es ka ta paga, es ta skiva lei méski es ten ki bai ku ses osus pa kadéia.

Ninhun inprégu ka ta da felisidadi; sintidu di verdaderu amor dja perdi i pessoas ta kaza óji i ta divorsia manhan.

Unidadi di kazas dja perdi lamentávelmenti, vergonha ôrgâniku ka ta izisti más, lesbianismu i homosexualismu bira más kunmun ki lava mon.

Sabe algun kuza sobri tudu es, tenta konxe kauza di tantu podridon, inkiri, buska, é sertamenti kel ki nu ta propõe na es livru.

N sta ta papia na linguagem di vida prátiku, ku vontadi di sabe kuzé ki ta skonde trás di kel máskara ki ta da medu di izisténsia.

N sta ta pensa na voz altu i ki bandidus di inteletu fla kel ki da es na gana.

Teorias dja bira kansativu i até es ta bende i ta revende na merkadu. Nton kuzé?

Teorias sô ta sirvi pa okasioba-nu preokupasons i amarga-nu más vida.

Ku djusta razon Goethe fla: “Tudu teoria é sinzentu i sô é verde árburu di fruta duradu ki é vida”…

Dja pobres pessoas kansá ku tantu teorias, gósi ta papia txeu sobri pratisismu, nu prisiza ser prátiku i konxe rialmenti kauzas di nos sufrimentus.