Bomoi

Na bomoyi ya mokolo na mokolo, tokomi komona ntango nyonso bokeseni oyo ekamwisaka. Batu ya bozwi na bandako kitoko mpe baninga mingi, bazali mbala mingi komona pasi mingi… Babola oyo basalaka na pikasi mpe loposo to bato ya kati-kati, mbala mingi bazali kobika na esengo ya solosolo.

Bamilionere mingi bazali komona pasi ya kobota te mpe basi ya bozwi bazali kolela na motema mpasi botomboki ya mibali na bango… Bazwi ya mabele bazali lokola bandɛkɛ ya likunya na kati ya bandako ya wolo, na ntango oyo bakoki kobika te kozanga “bakɛngɛli-nzoto”… Mibali ya Leta bazali kobenda minyɔlɔlɔ, bazali ata mokolo moko te na bonsomi, bazali kotambola bisika nyonso zingazingami na bato oyo bamibongisi na bibundeli tii na mino…

Tótalela likambo oyo na mozindo koleka. Tosengeli koyeba bomoi ezali nini. Moto na moto azali na bonsomi ya kopesa makanisi ndenge alingi… Báyeba nini báyeba, ya solo moto moko te ayebi eloko, bomoi ekómi mokakatano oyo moto moko te azali kokanga ntina…

Ntango bato balingi koyebisa biso ofele lisolo ya bomoi na bango, bazali kotánga makambo, bankombo mpe mabota, badati, mpe bongo na bongo, mpe bazali kosepela kosala masolo na bango… Babola wana bayebi te ete masolo na bango ezali kokoka te mpo makambo, bankombo mpe badati, ezali kaka nde libándá ya filme, likambo ya kati ezali kozanga…

Ezali na ntina makasi koyeba “ezalela ya makanisi,” mpo na likambo mokomoko ezali na ezalela ya motema boye to boye. Bizalela ezali ya kati mpe makambo ezali ya libándá, makambo ya libándá ezali nyonso te…

Tósolola na ntina ya bizalela ya kati, malamu to mabe, mitungisi, bolɛmbu, bondimá bilima, kobanga, kokakatana, ngɔlu, komitalela, komimonisa monene koleka ndenge ozali; bizalela ya komiyoka esengo, bizalela ya esengo, mpe bongo na bongo, mpe bongo na bongo, mpe bongo na bongo.

Na ntembe te, bizalela ya kati ekoki kokokana mpenza na makambo ya libándá to kozala ebandeli na yango, to kozanga boyokani ata moke te na yango… Ata ndenge nini, bizalela mpe makambo ezali kokesena. Ntango nyonso te makambo ezali kokokana mpenza na bizalela oyo eyokani na yango.

Ezalela ya kati ya likambo ya esengo ekoki kokokana te na yango. Ezalela ya kati ya likambo ya mawa ekoki kokokana te na yango. Makambo oyo tozelaki banda kala, ntango eyaki toyokaki ete eloko ezalaki kozanga…

Ya solo, ezalela ya kati oyo esengelaki kosangana na likambo ya libándá ezalaki kozanga… Mbala mingi likambo oyo tozelaki te ekómi nde oyo epesaki biso ntango ya malamu koleka…