Dy Botët

Të vëzhgosh dhe të vëzhgosh veten janë dy gjëra krejtësisht të ndryshme, megjithatë, të dyja kërkojnë vëmendje.

Në vëzhgim, vëmendja është e orientuar nga jashtë, drejt botës së jashtme, përmes dritareve të shqisave.

Në vetë-vëzhgimin e vetvetes, vëmendja është e orientuar nga brenda dhe për këtë, shqisat e perceptimit të jashtëm nuk shërbejnë, arsye kjo më shumë se e mjaftueshme që vëzhgimi i proceseve psikologjike intime të jetë i vështirë për neofitin.

Pika e nisjes së shkencës zyrtare në anën e saj praktike, është ajo që vërehet. Pika e nisjes së punës mbi veten, është vetë-vëzhgimi, ajo që mund të vërehet nga vetja.

Pa dyshim, këto dy pika nisjeje të cituara më sipër, na çojnë në drejtime krejtësisht të ndryshme.

Dikush mund të plaket i zhytur mes dogmave tolerante të shkencës zyrtare, duke studiuar fenomene të jashtme, duke vëzhguar qeliza, atome, molekula, diellë, yje, kometa, etj., pa përjetuar brenda vetes ndonjë ndryshim rrënjësor.

Lloji i njohurisë që transformon dikë nga brenda, nuk mund të arrihet kurrë përmes vëzhgimit të jashtëm.

Njohuria e vërtetë që mund të shkaktojë realisht një ndryshim thelbësor të brendshëm te ne, e ka bazën në vetë-vëzhgimin e drejtpërdrejtë të vetvetes.

Është urgjente t’u themi studentëve tanë Gnostikë që të vëzhgojnë veten dhe në ç’kuptim duhet të vetë-vëzhgohen dhe arsyet për këtë.

Vëzhgimi është një mjet për të modifikuar kushtet mekanike të botës. Vetë-vëzhgimi i brendshëm është një mjet për të ndryshuar në mënyrë intime.

Si rrjedhojë ose korollar i gjithë kësaj, mundemi dhe duhet të pohojmë në mënyrë të theksuar, se ekzistojnë dy lloje njohurish, e jashtme dhe e brendshme dhe se nëse nuk kemi brenda vetes qendrën magnetike që mund të dallojë cilësitë e njohurisë, ky përzierje e dy planeve ose radhëve të ideve mund të na çojë në konfuzion.

Doktrina të larta pseudo-ezoterike me shkencëtarizëm të theksuar në sfond, i përkasin terrenit të asaj që vërehet, megjithatë pranohen nga shumë aspirantë si njohuri e brendshme.

Ndodhemi pra përpara dy botëve, asaj të jashtme dhe të brendshme. E para nga këto perceptohet nga shqisat e perceptimit të jashtëm; e dyta mund të jetë e perceptueshme vetëm përmes shqisës së vetë-vëzhgimit të brendshëm.

Mendime, ide, emocione, mall, shpresa, zhgënjime, etj., janë të brendshme, të padukshme për shqisat e zakonshme, të përditshme dhe megjithatë janë për ne më reale se tryeza e ngrënies ose kolltuqet e dhomës së ndenjes.

Sigurisht që ne jetojmë më shumë në botën tonë të brendshme sesa në atë të jashtme; kjo është e pakundërshtueshme, e pathyeshme.

Në Botët tona të Brendshme, në botën tonë sekrete, ne duam, dëshirojmë, dyshojmë, bekojmë, mallkojmë, kemi mall, vuajmë, gëzojmë, jemi të zhgënjyer, të shpërblyer, etj., etj., etj.

Pa dyshim, dy botët e brendshme dhe të jashtme janë të verifikueshme eksperimentalisht. Bota e jashtme është ajo që vërehet. Bota e brendshme është ajo që mund të vetë-vërehet në vetvete dhe brenda vetes, këtu dhe tani.

Kushdo që me të vërtetë dëshiron të njohë “Botët e Brendshme” të planetit Tokë ose të Sistemit Diellor ose të Galaksisë në të cilën jetojmë, duhet të njohë paraprakisht botën e tij intime, jetën e tij të brendshme, të veçantë, “Botët e tij të Brendshme”.

“Njeri, njih veten dhe do të njohësh Universin dhe Perënditë”.

Sa më shumë të eksplorohet kjo “Botë e Brendshme” e quajtur “Vetvetja”, aq më shumë do të kuptojë se jeton njëkohësisht në dy botë, në dy realitete, në dy sfera, atë të jashtme dhe të brendshme.

Ashtu si dikush e ka të domosdoshme të mësojë të ecë në “botën e jashtme”, për të mos rënë në një humnerë, për të mos humbur në rrugët e qytetit, për të zgjedhur miqësitë e tij, për të mos u shoqëruar me të korruptuar, për të mos ngrënë helm, etj., po ashtu edhe përmes punës psikologjike mbi veten, mësojmë të ecim në “Botën e Brendshme” e cila është e eksplorueshme përmes vetë-vëzhgimit të vetes.

Realitetisht, shqisa e vetë-vëzhgimit të vetvetes është e atrofizuar në racën njerëzore dekadente të kësaj epoke të errët në të cilën jetojmë.

Ndërsa ne ngulmojmë në vetë-vëzhgimin e vetvetes, shqisa e vetë-vëzhgimit intim do të zhvillohet gradualisht.